VLORË- Fotaq Bala, ka shpërthyer në lot pasi IKMT i ka shembur bizneset edhe pronat në Jalë. I ulur poshtë një peme dhe i pamundur kundrejt fadromave të IKMT-së, pronari i restorantit në një nga zonat më të lakmueshme turistike në vend, qan me ngashërim pa folur asnjë fjalë. Ndërkohë që forca të shumta të policisë kanë rrethuar zonën, familjarët e tjerë të familjes Bala, shpërthejnë në mallkime kundrejt kryeministrit.

‘Ju lutem të gjitha atyre që kanë vënë dorë në këtë banesë në këtë truall në këtë shtëpi e të merren vesh të heqin dore, se nuk e kanë idenë me kë kanë të bëjnë. Unë betohem në Bibël, ai është një armik. Rama është një pjellë nepërkash.’- tha motra e Fitaq Balës.

‘I kam me dokumente të sakta që në ’89. Ua kam treguar dokumentet kanë ardhur të na asgjesojnë. Tani jemi në rrugë, kanë bërë krim, krim.’- u shpreh një nga pronaret.

Kjo është hera e dytë që familja Bala, haset me fadromat e IKMT-së, pasi edhe në vitin 2018 pronat e tyre u shembën. Banorët i kanë rindërtuar sërish pronat, pasi pretendojnë se kanë një vendim të gjykatës së Shkallës së Parë që tregon se nuk duhen shembur këto prona. Ndërsa nga ana e IKMT pretendohet se vendimi është hedhur poshtë nga Apeli dhe është dhënë e drejta e shembjeve.

IKMT i ka prishur po sot edhe një tjetër banesë 2-katëshe familjes Bala, të cilët sërish e kanë kundërshtuar vendimin, megjithatë fadromat nuk kanë ndaluar punën.