INSTAT denoncon
rënie të konsumit

Të dhënat e tre-mujorit të tretë të vitit 2011 të Institutit të Statistikave konfirmojnë një rënie të mëtejshme të konsumit në vend, një shqetësim i ngritur vazhdimisht edhe nga Banka e Shqipërisë.

Sipas të dhënave të INSTAT-it, gjatë tre-mujorit të tretë të vitit 2011 niveli i shitjeve me pakicë është ulur me 5.5% kundrejt të njëjtës periudhë të një viti më parë.

Banka e Shqipërisë ka konstatuar vazhdimisht, gjatë vitit që lamë pas, por edhe në fillim të 2012-ës, se konsumi dhe investimet private kanë pasur një ecuri të ngadaltë, duke kushtëzuar edhe rritjen nën potencial të ekonomisë.

Sipas BSH-së ka pasur një rënie të investimeve të huaja dhe dërgesave të emigrantëve, që janë edhe dy nga burimet kryesore të valutës që futet në vend.

Rënia, pritet të shoqërohet me një ngadalësim të mëtejshëm të konsumit dhe investimet private në vendin tonë. Sipas statistikave të publikuara në raportin e politikës monetare, të ardhurat nga emigrantët arritën në fund të tremujorit të tretë të 2011-ës në 132.6 milionë euro, duke shënuar një rënie prej 56.6 milionë euro kundrejt tremujorit të mëparshëm dhe një ulje me 25 milionë euro kundrejt të njëjtës periudhë të një viti më parë. ah/shqiptarja.com/