INSTAT rrëzon qeverinë: Janë 52
mijë vende të reja pune në 2 vjet

TIRANE- Për të dytin tremujor radhazi, norma e papunësisë ka mbetur e pandryshuar në kuotën 17.3%, shumë larg pretendimeve të qeverisë për hapjen e mbi 100 mijë vendeve të reja pune deri në vitin 2015. Në Anketën Tremujore të Forcave të Punës, INSTAT raporton se në qershor 2015, numri i të punësuarve në total arrin në 1,076,758 persona, vetëm 52,741 më shumë se në gjashtëmujorin e parë 2013, kur numri total i të punësuarve qe 1,024,017.

Në korrik të këtij viti, Kryeministri Edi Rama deklaroi se në tremujorin e parë të vitit, numri i të punësuarve për një vit qe rritur me 103,945 persona. “Krahasuar me tre mujorin e parë të vitit 2014, numri i të punësuarve është 10% më i lartë dhe kemi një rritje me 103 mijë e 945 persona. Ndërkohë që, duke filluar nga dita jonë e parë e qeverisjes kemi një të dhënë shumë domethënëse; 106 mijë e 121 forca të reja pune”, deklaroi kryeministri duke ju referuar treguesve të tremujorit të parë 2015.