Instituti i Shëndetit Publik:
Asnjë vdekje nga gripi

TIRANE- Vdekjet e dyshuara disa ditë më parë në Librazhd se janë shkaktuar nga gripi, nuk rezultojnë të jenë kështu. Kreu i Institutit të Shëndetit Publik, Enver Roshi, ka deklaruar se nuk ka pasur asnjë rast humbje të jetës me shkaktar kryesor gripin. Ai ka garantuar të gjithë popullatën se në vendin tonë nuk ka epidemi gripi, por së bashku me drejtorin e Shëndetit Publik në ministrinë e Shëndetësisë, Gazmend Bejtja, kanë kërkuar një vëmendje më të madhe në këto ditë kur temperaturat shënojnë disa gradë nën zero.

"Gjatë ditëve të fundit, vendi ka përjetuar një valë të ftohti. Gjithsesi nuk është evidentuar rritje e sëmundshmërisë infektive apo jo-infektive mbi nivelet e pritshme mesatare të periudhës. Minimizimi i dëmeve për shëndetin është i lidhur si me përgatitjen dhe gatishmërinë e sistemit shëndetësor për t'iu përgjigjur problematikës specifike shëndetësore ashtu dhe me masat parandaluese dhe përkujdesëse të qytetarëve", - ka deklaruar drejtori Bejtja. Ai nuk i ka kursyer as këshillat.

"Qytetarët është e nevojshme të vishen me veshje të ngrohta, në rast dalje jashtë për të ruajtur temperaturën trupore. Pjesët e ekspozuara duhet të mbulohen. Për t'u ruajtur nga rrëshqitjet është e nevojshme të vishen këpucët e duhura dhe të evitohet dalja në mëngjes dhe në darkë, veçanërisht për persona të moshuar apo që vuajnë nga sëmundje kronike", - ka përfunduar ai.
(sg/shqiptarja.com)

/Shqiptarja.com