Specialistja pranë Institutit të Shëndetit Pulbik, Zaira Poga, apelon që çdo qytetar apo subjekt të pastrojnë depozitat vetiake të ujit.
“Monitorimi i ujit të pijshëm kryhet çdo ditë nga Drejtoria e Shëndetit Publik për t’u garantuar qytetarëve një cilësi dhe shëndet të mirë për popullatën. Por, problem qëndron te depozitat e ujit. Ka mjaft familjarë të cilët kanë vite e vite që kanë depozita uji dhe nuk i kanë të pastruara dhe dezinfektuara.
Uji në këto depozita nuk rekmandohet për pirje dhe vetë qytetarët e dinë këtë gjë dhe thjesht blejnë. Por, rekomandimet e OBSH tregojnë që duhet konsumuar ujë higjenikisht i pastër. Pra, qytetarët duhet të marrin masa që depozitat të pastrohen dhe dezinfektohen”, u shpreh Zaira Poga për mikrofonin e A1 Report.
Për të shmangur sadopak rrezikun e konsumimit të ujit nga depozitat, specialistja rekomandon që të paktën 2 hërë në vit të kryhet pastrimi dhe dezinfektimi i tyre.
(v.gj/shqiptarja.com)