INTERVISTA/ Fatos Tushe: Do të
krijojmë markën 'Lushnja' në Bujqësi

TIRANE - Fatos Tushe është ndër kandidatët e paktë socialistë që u rikonfirmua si kandidat në Bashkinë, në të cilën ai punon. Në krye të Bashkisë së Lushnjes, Tushe erdhi pasi la mandatin komod të deputetit dhe u përball, në një garë elektorale, me një ish-kandidat nga LSI dhe fitoi.

Në këto zgjedhje, ai është në garë i mbështetur fort nga shumë prej atyre, të cilët dikur i kishte kundër. Kjo, falë aleancës së krijuar tashmë mes Partisë Socialiste, në të cilën Tushe bën pjesë dhe Lëvizjes Socialiste për Integrim.

Duke folur për gazetën Shqiptarja.com, Tushe thotë se asnjëherë nuk i ka quajtur dhe trajtuar si armiq, por si kundërshtarë të denjë, me shumë vlera, synimi final i të cilëve ka qenë puna për zhvillimin e qytetit të Lushnjes. Eshtë ky synim final, që i bashkoi militantët e majtë në PS e LSI në këto zgjedhje. Tushe thotë se, në konceptin e tij, në Lushnje nuk ka asnjë armik, por vetëm njerëz, me të cilën debatohen idetë për mënyrën se si e shikojnë zhvillimin e qytetit.