Intervista/ Qefalia: Të reformohet
SHISH, s'duhet me njerëz politikë

TIRANË - Skandali i fundit i agjentit të SHISH, Florian Bushi, i cili i serviri një grupi kriminal informacione sekrete që i përdori për atentatin në Fier, ku u vra shtetasi Denis Kasa dhe u plagosën dy persona të tjerë, rikthen edhe njëherë në vëmendjen e politikës reformën në këtë institucion. Ky është qëndrimi i mazhorancës që ka për synim shndërrimin e Shërbimit Informativ Shtetëror në një strukturë të pavarur dhe profesionale.

Anëtari i mazhorancës në komisionin parlamentar të Sigurisë, Xhemal Qefalia e cilëson ngjarje të rëndë dekonspirimin e informacioneve sekrete dhe më keq akoma përcjelljen e tyre grupit kriminal që si rezultat solli një përplasje me armë në afërsi të Fierit, ku mbeti i vrarë Denis Kasa. Gjatë një interviste për “Shqiptarja.com”, Qefalia shprehet se SHISH duhet të zhvillojë një analizë pa humbur kohë, me qëllim zbardhjen e skandalit. Ndonëse SHISH ka qenë një nga institucionet më të sulmuara nga opozita e djeshme, sot në qeveri, Qefalia thotë se mazhoranca ka vërtetuar shqetësimet e saj kur ishte në opozitë, por kurrsesi ajo në kushtet aktuale s’mund të bëjë Gjykatësin.