Investimet, Shqipëria tryezë në
Tiranë me Italinë dhe Serbinë

TIRANE- Vitin e ardhshëm diplomacia shqiptare pritet të zhvillojë disa aktivitete të rëndësishme sa i takon intensifikimit të zhvillimeve dypalëshe dhe bashkëpunimit rajonal. Në vitin 2016 do të ketë një takim trepalësh mes qeverisë shqiptare, asaj italiane dhe asaj serbe. Po ashtu do të ketë një mbledhje të tretë të përbashkët mes dy qeverive: të Kosovës dhe Shqipërisë. Në këto kushte, duket se Kosova nuk do të jetë e përfshirë në tryezat diplomatike rajonale të organizuara nga Tirana zyrtare. Lajmi u bë i ditur nga Ministri i Punëve të Jashtme, Ditmir Bushati, i cili ishte dje në Komisionin Parlamentar të Punëve të Jashtme, për të pasqyruar projektbuxhetin e ministrisë së tij për vitin 2016.