Në një fjalim të regjistruar dhe transmetuar në televizionin kombëtar, udhëheqësi suprem i Iranit, Ajatollah Ali Khamenei, tha se Republika Islamike nuk do të lëshojë pe përballë presionit të jashtëm dhe se, sipas tij, “ata që shkaktojnë trazira duhet të vihen në vend”.

Deklarata vjen ndërsa organizatat e të drejtave të njeriut raportojnë një rritje të ndjeshme të arrestimeve dhe viktimave pas disa ditësh protestash të nxitura nga inflacioni i lartë dhe rënia e monedhës kombëtare, riali.

Sipas grupeve të të drejtave të njeriut, më shumë se 10 persona kanë humbur jetën dhe dhjetëra të tjerë janë ndaluar në demonstratat që janë përhapur në disa qytete të Iranit. Pamje të shpërndara në rrjetet sociale tregojnë qytetarë që u bëjnë thirrje të tjerëve t’u bashkohen protestave.

Autoritetet iraniane kanë ndjekur një qasje të dyfishtë, duke deklaruar se protestat ekonomike janë të ligjshme dhe do të trajtohen përmes dialogut, ndërsa tubimet janë shpërndarë me gaz lotsjellës pas përplasjeve të dhunshme në rrugë.

Khamenei pranoi vështirësitë ekonomike, duke thënë se tregtarët kanë të drejtë të ankohen për kushtet aktuale, por shtoi se, sipas tij, “biseda me ata që shkaktojnë trazira është e kotë”.

Raportime për dhunë ka pasur kryesisht në qytete të vogla në provincat perëndimore të Iranit. Autoritetet kanë njoftuar se dy pjesëtarë të forcave të sigurisë kanë humbur jetën dhe më shumë se dhjetë janë plagosur gjatë trazirave.

Grupi kurd për të drejtat e njeriut Hengaw pretendon se deri të premten në mbrëmje janë identifikuar 133 persona të arrestuar, një rritje e ndjeshme krahasuar me ditën e mëparshme.

Tensionet janë rritur edhe pas deklaratave të presidentit amerikan Donald Trump, i cili tha se SHBA është “gati për veprim”, pa sqaruar hapat konkretë kundër Iranit.

Paralajmërimi vjen në një periudhë të vështirë për Teheranin, me ekonominë e goditur nga sanksionet, probleme me furnizimin me ujë dhe energji elektrike, si dhe pas humbjeve strategjike në rajon që nga lufta në Gaza në vitin 2023.

Protestat aktuale konsiderohen më të mëdhatë që nga demonstratat masive të vitit 2022 pas vdekjes në paraburgim të Mahsa Amini, edhe pse nuk kanë arritur ende të njëjtin intensitet.