Isaac në New Orleans 7 vjet
nga uragani Katrina

LUZIANA - Uragani Isaac mbërriti në brigjet e Luizianës më parë seç ishte parashikuar dhe disa orë përpara përvjetorit të uraganit Katrina, që 7 vjet më parë shkaktoi 1800 të vdekur. Stuhi me erëra dhe shira të fortë, kanë përfshirë lumin Misisipi, në jug të New Orleans dhe uragani po spostohet drejt qytetit. 250 mijë banorë janë pa drita.

Sipas Qendrës Kombëtare të Uraganëve, Isaac po ecën me një shpejtësi prej 130 km orë dhe ka goditur New Orleans, pikërisht 7 vjet pas dëmeve kolosale që shkaktoi uragani Katrina. Në Luizianë gjithçka është mbyllur. Mbi 250 mijë persona janë pa energji elekrike, ndërsa në disa zona është vendosur ndalim qarkullimi nga ora 8 e mbrëmjes deri në 6 të mëngjesit. Uragani Isaac ka goditur New Orleans gjatë natës me një fuqi të madhe duke shkaktuar dëme, vlera e të cilave do të bëhet e ditur disa ditë më vonë.

EVAKUOHEN 2100 TE BURGOSUR
Mbi 2100 të burgosur janë transferuar në orët e fundit nga burgu i Luizianës, një nga zonat e konsideruara të rrezikshme, drejt një burgu më të sigurtë. Lajmi është bërë i ditur nga guvernatori i Luizianës, Bobby Jindal.

APELI I OBAMES: EVAKUOHUNI
Presidenti amerikan, Barak Obama më përpara i ka bërë thirrje qytetarëve që të mos përpiqen të sfidojnë fatin, por të respektojnë rregullat e evakuimit. Edhe në New Orleans mijëra banorë janë evakuar ndërsa qyteti është përgatitur të përballojë uraganin. “Dëgjoni autoritetet, nëse ju thonë të evakuoheni, atëherë bëjeni atë”, deklaroi mbrëmë kreu i Shtepisë së Bardhë. "Isaac" kërcënon të përmbysë brigjet e katër shteteve. Janë me qindra qytetarë të evakuuar, por edhe shumë të tjerë kanë vendosur të mos braktisin shtëpitë e tyre duke mbyllur dyert me fortifikime të posacme për uraganët. Shpallja e gjendjes se jashtzakonshme ne Luiziana i ka hapur rrugën financimeve federale, ndersa qytetare te shumte jane evakuuar.

Uragani ka lënë të vdekur të paktën 24 njerëz në Haiti dhe Republikën Domenikane, si dhe ka shkaktuar përmbytje dhe dëme të konsiderueshme në Karaibe.

(sg/shqiptarja.com)