Ish-ministri:Anijet s'gjurmohen prej 9
muajsh,po cenohet siguria kombëtare

Ish-ministri i Bujqësisë nga radhët e LSI, Edmond Panariti ka ngritur një shqetësim në rrjetet sociale këtë të martë që lidhet me sistemin Bluebox të anijeve të peshkimit.

Sipas tij, anijet nuk monitorohen në det të hapur. Në një status në “Facebook”, Panariti thotë se po cenohet siguria kombëtare pasi rritet rreziku i trafiqeve të paligjshme, përfshirë edhe ai i narkotikëve, me mjete të cilat nuk gjurmohen dhe zbulohen. 

"Ka më shumë se 9 muaj që mungon sinjali GIS i sistemit Bluebox në anijet tona të peshkimit për shkak të mos pagesës së kontraktorit. Çfarë po ndodh? Cilat janë pasojat? Së pari, po cenohet rëndë siguria kombëtare, sepse rritet rreziku i trafiqeve të paligjshme përfshirë dhe ai i narkotikëve, me mjete të cilat nuk gjurmohen dhe zbulohen", shkruan në Facebook, ish-ministri i LSI, Edmond Panariti.

STATUSI I ISH-MINISTRIT PANARITI
Nuk ka smartphone dhe automjet të dekadës së fundit që nuk gjurmohet dhe identifikohet në çdo çast për pozicionin e tij kudo në botë me përjashtim të anijeve të flotës tonë të peshkimit. Ka më shumë se 9 muaj që mungon sinjali GIS i sistemit Bluebox në anijet tona të peshkimit për shkak të mos pagesës së kontraktorit. Çfarë po ndodh? Cilat janë pasojat? Së pari, po cenohet rëndë siguria kombëtare, sepse rritet rreziku i trafiqeve të paligjshme përfshirë dhe ai i narkotikëve, me mjete të cilat nuk gjurmohen dhe zbulohen.

Së dyti evazion i rëndë fiskal nga mungesa e raportimit të veprimtarisë ekonomike të peshkimit dhe cenim i rëndë i statistikave të sektorit duke na vendosur në disavantazh të thellë në negociatat dhe financimet nga Bashkimi Evropian. Mos harroni që jemi ndër vendet e para që përkrah Shteteve të Bashkuara, nënshkruan dhe ratifikuam marrëveshjen e masave portuale për ndalimin e peshkimit dhe trafiqeve të paligjshme dhe partneret tanë strategjikë presin rezultate dhe jo fjalë.

Redaksia Online
l.q/Shqiptarja.com