Itali, hyjnë në fuqi masat e reja! Mësuesit nuk hynë dot në shkolla pa Certifikatën e shëndetit!

Duke nisur nga dita e sotme, Italia fut në fuqi masat e reja kufizuese, në përpjekjen për të vënë nën kontroll valën e re të infeksioneve me COVID-19. Ndërsa është premtuar për protesta të shumta, autoritetet italiane janë zotuar për tolerancë zero ndaj demonstruesve që mund të bllokojnë stacionet e trenave për të protestuar ndaj rregullave të reja.

Nga sot, udhëtarët që do të përdorin trenat duhet të tregojnë të ashtuquajturën “green pass”, me anë të cilës ata do të dëshmojnë vaksinimin anti-covid, një test negativ COVID në 48 orët e fundit ose shërim nga sëmundja në gjashtë muajt e fundit.

Rregulli, i shpallur javë më parë, vlen për fluturimet e brendshme, udhëtimet me tren midis rajoneve dhe udhëtimet në det. Disa tragete janë të përjashtuara, veçanërisht ato që shërbejnë për shumë ishuj të vegjël, të cilët nuk kanë lidhje të tjera me kontinentin.

Autobusët, tramvajet dhe metrotë janë të përjashtuar nga rregulli, i cili u njoftua nga qeveria e kryeministrit Mario Draghi kur ngarkesat e përditshme të rasteve filluan të rriteshin në mënyrë të qëndrueshme pasi varianti Delta i virusit u bë i përhapur në Itali.

“Green Pass” tashmë është duke u përdorur për ata që duan të hanë darka në ambiente të mbyllura, të shkojnë në palestra ose të marrin pjesë në koncerte.

Ndërkohë që ky rregull është vënë edhe për mësuesit, ku në disa rajone atyre u është mohuar hyrje në ambientet shkollore pa posedim të një nga dëshmive.

Deri më tani, rreth 70% e banorëve të Italisë mbi 12 vjeç janë vaksinuar plotësisht. Por, ekspertët kanë shprehur shqetësimin se shumë njerëz në grup moshën 50-69 vjeç nuk kanë marrë vaksina dhe as nuk janë regjistruar për to.

/KT/Shqiptarja.com

TAG:
• itali
• masat anticovid