Itali, thatësira e madhe mbyll 100
shatërvanët e famshëm të Vatikanit

Thatësirën e zgjatur në Itali ka nisur ta ndiejë edhe Vatikani, që vendosi të mbyllë 100 shatërvanët e famshëm të tij, përfshirë dy kryeveprat e stilit barok në sheshin e Shën Pjetrit.
 
Vapa dhe thatësira e madhe pason një periudhë dyvjeçare reshjesh shiu nën mesataren, që ka detyruar autoritetet të urdhërojnë masa për përdorimin e kufizuar të ujit në rreth 20 komuna pranë kryeqytetit italian.
 
Është hera e parë që drejtuesit e Vatikanit shtrëngohen të mbyllen shatërvanët, por më shumë kjo bëhet në shenjë solidariteti me Romën gjatë kësaj thatësire që ka prekur pothuaj gjithë Italinë.
 
“Për aq sa mbajmë mend ne, kjo është hera e parë që ndodh një gjë e tillë. Roma është e bekuar me ujë dhe ky rast përbën një përjashtim”, është shprehur zëdhënësi i Vatikanit, Greg Burke.
Banorët shprehen të befasuar nga gjesti i selisë së shenjtë.
 
“Nuk ka ndodhur kurrë ndonjëherë. Kjo është hera e parë që mbyllen shatërvanët e Vatikanit”, thotë Cristina, banore në Romë.
 
Këto masa sipas “Radio Vatikanit”, janë në një linjë me predikimet e Papa Françeskut mbi mjedisin.
 
Frikën e tij ekologjike, ati i shenjtë e parashtroi në një dokument kushtuar kësaj teme në 2015-n, ku denonconte praktikat e shpërdorimit dhe theksonte rëndësinë e ujit të pijshëm.
 
Thatësira ka goditur dy të tretat e tokave bujqësore ndërsa kostoja  deri tani llogaritet rreth dy mld euro.
 
Redaksia Online
Er.K/Shqiptarja.com