Iu rrezikua pushteti, Liz Truss kërkon falje për gabimet e bëra 1 muaj si kryeministre e Britanisë: Politikanët e ndershëm kërkojnë ndjesë

Kryeministrja britanike është shprehur e vendosur që të drejtojë konservatorët  deri në zgjedhjet e ardhshme, si një tjetër përpjekje e saj për të shpëtuar autoritetin në këto ditë të vështira. Në një intervistë për BBC. Trus kërkoi falje për gabimet e bëra prej saj, e në një kohë kur ministri i ri i financave hodhi në kosh shumicën e propozimeve të saj për uljen e taksave me qëllim për të ndikuar në stabilizimin e luhatjeve të tregut.   

Ajo tha se muaji i saj i parë si kryeministre, nuk kishte qenë perfekt, por kishte përmirësuar gabimet e bëra dhe sipas saj do të kishte qenë papërgjegjshmëri nëse nuk do të ndryshonte kurs. Kryeministrja Britanike ripësrëriti synimin e saj për të nxitur rritjen ekonomike, por tashmë ky pikësynim do të dojë më shumë kohë. Tërheqja nga plani i ri i taksave u mirëprit nga investitorët, por agjenda ekonomike e kryeministres Truss mbeti pa mbështetje pak javë pas publikimit të saj. 

Gjatë intervistës Liz Truss pranoi përgjegjësinë e saj se me planin e saj shkoi shumë larg dhe tepër shpejt, dhe për këtë kërkoi falje.  Ajo shtoi se i qëndron mendimit se ulja e taksave sjell rritje ekonomike, por ruajtja e stabilitetit financiar është prioritet për momentin.  

"Unë mendoj se është shenjë e një politikani të ndershëm që thotë: po, kam bërë një gabim. Unë e kam adresuar atë gabim. Dhe tani ne duhet të punojmë për njerëzit".

Në total, 32 miliardë paund nga 45 miliardë paund në uljet e taksave të shpallura në mini-buxhetin e muajit të kaluar janë hequr tani, duke përfshirë planet për të ulur normën bazë të tatimit mbi të ardhurat nga 20 në 19 përqind nga prilli. Ndryshimet e befta nxitën zërat në radhët e konservatorëve se Truss duhej të largohej, pavarësisht se rregullat e partisë parandalojnë një sfidë formale të lidershipit për një vit. Mediat thonë se mund të dorëzohet një letër mosbesimi si një përpjekje për të detyruar drejtuesit e konservatorëve të ndryshojnë rregullin që u lejon deputetëve të anashkalojnë anëtarësinë dhe të zgjedhin vetë një drejtues të ri

G.MO/KT/Shqiptarja.com

TAG:
• Mbreteria e Bashkuar
• Britani e Madhe
• Liz Truss