Ivanov: “Deklarata e Tiranës” synon
ta kthejë Maqedoninë në ‘Qipro’ 

Thelbi i deklaratës së partive shqiptare është ndryshimi i rendit kushtetues të Maqedonisë dhe nga shtet multietnik Maqedonia të shndërrohet në shtet bietnik. 

"Për të bërë një krahasim mund të them se Maqedonia mund të shndërrohet në Qipro vetëm se Maqedonia nuk është ishull" shprehet  presidenti i Maqedonisë Gjorge Ivanov në një  intervistë për televizionin kombëtar kroat HTV.

“Qëllimi i deklaratës së Tiranës është që këto 20 për qind të ndryshohen, gjuha shqipe të jetë e njëjtë me gjuhën maqedonase. Me këtë shkurtohen të drejtat që i kemi në Maqedoni, sepse turqit kanë komunë në të cilën gjuha turke është zyrtare, shkollat janë në gjuhën turke . Ne kemi komunë rome në të cilën gjuha rome është zyrtare, gazeta zyrtare është në gjuhën rome, gjithashtu shkollat janë në gjuhën rome. Edhe serbet kanë komunë në gjuhën serbe. Kështu që me deklaratën e Tiranës këto të drejta do ti takonin vetëm një etniteti, vetëm shqiptarëve”, deklaroi Ivanovi

Kreu i shtetit refuzon të mandatojë kreun e LSDM Zaev pikërisht për shkak të platformës shqiptare të cilën e konsideron se cënon sovranitetin e vendit. Ai duket i vendosur në qëndrimin e tij pavarisht edhe thirrjeve të ndërkombëtarëve.

Rasti Qipro
Republika e Qipros është shteti i ndodhur në ishullin me të njëjtin emër në Detin Mesdhe, 113 kilometra në jug të Turqisë dhe 120 kilometra në perëndim të bregdetit të Sirisë. 37% i territorit të Republikës së Qipros është pushtuar nga Turqia që nga 1974 .

Vendi ka dy gjuhë zyrtare: greke dhe turke. Qiproja është vend ishullor në skajin verilindor të Detit Mesdhe, më afër Turqisë se Greqisë.

Më parë ka qenë i banuar kryesisht nga grekët por më vonë edhe nga Turqit.

Në vitin 1974, pas një tentimi të juntës ushtarake greke për ta lidhur me Greqinë ndërhyri Turqia me ushtri dhe pushtoi dhe e ndau ishullin në dy pjesë, pjesa Greke,  pjesa Turke  Qipro më parë ishte republike nga viti 1960 dhe ka qenë koloni Angleze.

Më datë 01.05.2004 pjesa Greke u anëtarësua në BE, përkundër votimit grek kundër bashkimit të ishullit ndërsa Turqit votuan për bashkim.

Redaksia Online
e.m/Shqiptarja.com