Javën e ardhshme nis vaksinimi i moshës +60 vjeç! Klodiana Spahiu: 14 mijë vaksinime në Durrës, bashkë do ia dalim

Deputetja Klodiana Spahiu ka inspektuar procesin e vaksinimit që po zhvillohet në qytetin e Durrësit. Në qendër të qytetit është ndërtuar një tendë enkas për këtë proces, në të cilën funksionojnë 6 vende vaksinimi. Spahiu ka pyetur personat që kanë kryer vaksinimin nëse kanë pasur ose jo shqetësime pas bërjes së vaksinës, duke i garantuar ata se nëse ndodh që të kenë shqetësime, ato janë vetëm të përkohshme dhe pa probleme për shëndetin e tyre. Duke folur më pas për ecurinë e procesit të deritanishëm, Klodian Spahiu tha se ne të gjithë e dimë se sa i rëndësishëm është ky proces dhe më vjen mirë që Durrësi deri tani ka arritur në 14 mijë persona të vaksinuar.

"Këtu në Durrës është vendosur tenda që të jetë një numër sa më i madh numri i vaksinimeve. Ecuria e procesit është shumë e mirë. Ky proces do të vijojë i tillë. Deri tani janë bërë 14 mijë vaksina në Durrës. Të gjithë po punojnë në mënyrë intensive për ta përballuar këtë proces. Vetëm përmes vaksinimit sa më të madh të popullsisë mund ta përballojmë këtë situatë. Do t'ia dalim falë bashkëpunimit sa më të mirë edhe me qytetarët", tha ajo.

Spahiu iu bëri thirrje qytetarëve që të paraqiten pranë qendrave të vaksinimit sapo të njoftohen nga mjeku i familjes. Javën e ardhshme pritet që të nisë vaksinimi i personave me moshë 60 vjec e lart. Deri tani, përveç stafit mjekësor që u vaksinua i pari,  janë vaksinuar të moshuarit me moshë 70+ si dhe arsimtarët, pedagogët dhe punonjësit e policisë.  

 

K.T./r.k./Shqiptarja.com

TAG:
• Durres
• Klodiana Spahiu
• zgjedhjet parlamentare 2021
• vaksinimi masiv