Jorida Tabaku 'zbulon' skemën e përfitimit të tenderave në Shqipëri

Deputetja e PD-së, Jorida Tabaku në një deklaratë për shtyp ka akuzuar kryeministrin e vendit Edi Rama për abuzim me tenderat.

Në deklaratën e saj, Tabaku është shprehur është zbuluar skema e përfitimit të tenderave në vend. Sipas saj, për të përfituar një tender ose duhet të jesh oligark, ose kriminel, ose mik dhe familjar i kryeministrit Rama.  

Për të përfituar një tender publik duhet të jesh mik i kryeministrit. Firma Advanced Bisness Solution, me bashkëpronar Armand Frangun, baxhanak i kryeministrit, ka përfituar tenderin për OSHEE-në edhe pse kishte dhënë ofertën më të lartë. Të gjitha këto tendera janë qoka për të afërmit e kryeministrit. Tenderat që i shpërndahen oligarkëve janë një provë e rëndë që po bëhet me krimin për tenderat në Shqipëri. Një në tre tendera jepen pa garë. 26% e tendave i janë dhënë ofertës më të lartë. Prokurimet Publike janë dëshmi e qartë e një partie të korruptuar që po qeveris vendin.
Ne angazhohemi për të ndryshuar ligjin koncesioneve, kjo që po i ndodh ekomonisë është kapja e radhës.

LEXO EDHE:
Ja pse 'lirimi' i Sali Berishës i gëzoi të gjithë

Jorida Tabaku

Deklarata e plotë:

Në Shqipëri, mund të fitosh një tender publik vetëm nëse je i lidhur me qeverinë. Rasti i Mond Begos i cili pasi ka ndryshuar katër apo pesë emra duke krijuar kompani nga hiçi për të fituar tendera publikë.

Ky nuk është vetëm konkluzioni i Partisë Demokratike, ky është konstatim i raportit të fundit të DASH, i Gjykatës Europiane të auditimit dhe strategjisë së zgjerimit. Por kjo fatkeqëisht është dhe e vërteta e publikuar nga raportet e Agjensisë së Prokurimit Publik.

Por, për të përfituar një tender publik është e domosdoshme që të jesh edhe brenda rrethit familjar të kryeministrit Rama, oligark brenda kryeministrit, ose kriminel me rekorde kriminale.

Firma ABS që Partia Demokratike po denoncon sot,  jo rastësisht është e lidhur me familjen e kryeministrit, ka mundur të përfitojë 15.6 milion euro tendera nga shtatori 2013 deri më sot.

Kompania “Advanced Business Solutions” zotërohet në bashkëpronësi nga baxhanaku i kryeministrit Armand Frangu, i cili së bashku me kompaninë B360 marrin pjesë gjithmonë në të njëjtat tendera, gjithmonë duke ndarë përfitimet me njëri-tjetrin.

Si rregull për ta bërë garën në dukje të ligjshme, por nga ana tjetër është thjesht vetëm një farsë.

Në tenderin e fundit të ofruar nga OSHEE me një vlerë prej 1.94 mld lekësh (të vjetër) kompania ABS ka pasur ofertën më të lartë dhe përsëri ka fituar.

Ndërkohë që kompania B360 shpk ka marrë pjesë në këtë tender si spectator.

Jo vetëm kaq, por Partia Demokratike këtu publikon të 27 tenderat që kjo kompani ka fituar nga shtatori 2013 e deri më sot.

Të gjitha këto tendera janë qoka që kryeministri ka rezervuar nga tepsia e parave publike, për njeriun e familjes së tij.

Tenderi më i fundit i marrë nga kompania e tij nga AKSH-i, ka një vlerë prej 1.56 miliardë lekësh dhe përsëri ka fituar oferta më e lartë.

Tenderat që i shpërndahen oligarkëve, ofiqarëve të PS-së, të inkriminuarve që mbajnë me oksigjen deputetët e mazhorancës dhe së fundi familjen e kryeministrit, janë një provë e rëndë për krimin që po kryhet me tenderat publik në Shqipëri.

Këto janë një tjetër dëshmi që provon akuzën e ngritur nga Partia Demokratike dhe faktuar edhe nga Gjykata e Auditit të Bashkimit Europian se 1 në 3 tendera jepet pa garë, 1 në 3 tendera jepet abuzivisht.

Jo vetëm kaq, shembulli i kompanisë së baxhanakut të Ramës, dëshmon edhe raportimet e Departamentit Amerikan të Shtetit që thekson se “Raportet e korrupsionit në prokurimin e qeverisë janë të zakonshme.”  

Vetëm për vitin 2017 sipas të dhënave publike të disponueshme online nga Agjensia e Prokurimit Publik, 1281 ose 26% të tenderave të prokuruar, janë dhënë me ofertën më të lartë.

Kjo I ka kushtuar buxhetit të shtetit 41 milionë euro, që mund të ishin përdorur për ndihmën ekonomike, që  mund të ishin përdorur për mirëmbajtjen e të gjitha rrugëve në Shqipëri.

Prokurimet publike janë dëshmi e qartë e dështimit të turpshëm dhe vjedhjes së hapur që një qeveri e korruptuar ka prodhuar nga shtatori i vitit 2013 e deri më sot.

Partia Demokratike angazhohet që çdo tenderim abuziv, ta çojë përpara ligjit.

Angazhohet për të ndryshuar ligjin e konçesioneve, Ligjin e PPP-ve dhe Ligjin e Prokurimeve, për të siguruar një garë të hapur, duke besuar se vetëm me një garë të hapur mund të çlirohet ekonomia, mund të vijnë investimet e huaja, mund të rritet punësimi.

Kjo që po i ndodh sot ekonomisë është thjeshtë kapja e rradhës nga kryeministri dhe familjarët e tij. 

/xy/Shqiptarja.com

TAG:
• edi rama
• PD
• Jorida Tabaku
• tenderat