TIRANE - Partia Drejtësi, Integrim dhe Unitet ka reaguar ndaj kërkimeve të shtetit grek për naftë në detin Jon, njoftim i cili u bë i ditur dje nga mediat greke.

Nëpërmjet një njoftimi për shtyp, PDIU shkruan se “Nëse këto kërkime zhvillohen saktësisht në zonat e kontestuara dhe në përputhje me marrëveshjen e hedhur poshtë nga Gjykata Kushtetuese dhe që nuk është formalizuar as nga Parlamenti grek, atëherë ky akt do të ishte një provokim i rëndë i shtetit shqiptar, i dinjitetit të tij, i interesave të tij madhore. Shqipëria duhet t’i kërkojë zyrtarisht Greqisë informacion mbi zonat ku kërkohet naftë dhe nëse ato përputhen me ndarjen sipas marrëveshjes së hedhur poshtë nga Gjykata jonë Kushtetuese.”

Duke iu referuar edhe vizitës së disa zyrtarëve grek në Shqipëri në varrezat, sipas tyre të ushtarëve grek të rënë gjatë luftës së Dytë Botërore, PDIU thotë se “Patriotizmi shqiptar po provokohet me tubime partish politike greke mbi varreza të rreme të ushtarëve pushtues grekë në Jug të vendit, apo me dhunim të sovranitetit tonë në det. »

Në këto kushte, PDIU ngre dy kërkesa, njërën ndaj autoriteteve tona zyrtare dhe njërën ndaj ministrit të jashtëm grek Dimitris Avramopulos.
«Është një kërkesë e përsëritur: Shqipëria duhet t’i kërkojë zyrtarisht sqarime Greqisë për zonat ku kërkohet naftë prej vendit fqinjë, dhe nëse konfirmohet informacioni i lartpërmendur, atëherë të ndiqen të gjithë veprimet ligjore për të ndaluar vazhdimin e kërkimeve të naftës», thuhet në njoftimin zyrtar të partisë Drejtësi, Integrim dhe Unitet.

Ndërkaq, drejtuar kryediplomatit grek, përsa i përket deklaratës së djeshme, i cili u shpreh se në Ballkan po rritet shovinizmi, PDIU thotë : « Ai duhet të kuptojë se në Shqipëri, nuk ka forcim të shovinizmit, por ka forcim të patriotizmit, të ndjenjës kombëtare, të ndjenjës së mbrojtjes së dinjitetit kombëtar, të interesave kombëtare. Këto ndjenja po provokohen prej Greqisë, e cila vazhdon të mbajë në raport me Shqipërinë qoftë një axhendë rivendikimesh historike siç u duk me tubimet politike mbi varrezat e rreme të ushtarëve grekë, qoftë me dhunimin e sovranitetit tonë në det, e aq më tepër prej faktit se Greqia nuk po shpreh gatishmërinë për zgjidhjen e çështjes çame. »

Redaksia Online
(Gre.M/Shqiptarja.com)