Receta

Kek me kajsi të freskëta nga zonja Albana

Në këtë hapësirë të faqes tonë do të gjeni mënyrën e përgatitjes së recetave të gatimit të ideuara nga Zonja Albana. Këto receta Zonja Albana i gatuan çdo ditë në emisionin Rreze Dielli nga ora 09:00 – 10:00.

Redaksia 4 Qershor, 12:26 | Përditesimi: 4 Qershor, 12:28

Kek me kajsi të freskëta

Përbërësit:

300 gr miell
100 ml qumësht
80 ml vaj
140 gr sheqer
3 vezë
4-5 kajsi të pjekura mirë
1 pako pluhur fryrës për ëmbëlsira
Sheqer pluhur sipas dëshirës

Përgatitja:

LEXO EDHE:
Pulë me oriz në furrë nga zonja Albana

Në një enë të thellë hedhim vezët dhe i përziejmë me anë të një rrahësi elektrik ose një piruni. Kur vezët të jenë rrahur mirë, shtojmë sheqerin dhe vazhdojmë me përzierjen derisa të shikojmë që kokrrizat e tij janë shkrirë plotësisht. Më pas shtojmë qumështin dhe pak vaj. Teksa vijojmë me përzierjen, shtojmë pak nga pak edhe miellin bashkë me fryrësin për ëmbëlsira. Kur të jetë formuar një masë brumi kremoze e trashë dhe pa kokrra hedhim gjysmën e tij në një tavë rrethore. Ndërkohë presim në copëza të vogla kajsitë dhe i vendosim në një enë duke i përzier me dy lugë sheqer. Pasi t’i kemi përzier mirë, shtojmë kajsitë në qendër të brumit dhe më pas hedhim pjesën tjetër të brumit. Tundim paksa tavën në mënyrë që brumi të shtrihet në të gjithë sipërfaqen e saj dhe e vendosim të piqet në furrë të parangrohur për 35-40 minuta në temperaturë 180 gradë Celsius. E servirim kekun sipas dëshirës me pak sheqer pluhur sipër.

MC/Shqiptarja.com

TAG: