Kërkesa absurde e PD, shtyrja e 
zgjedhjeve, vetëm në rast lufte

Kërkesa e Partisë Demokratike për shtyrjen e afatit të zgjedhjeve mund të pranohet vetëm nëse Shqipëria do të futet në luftë brenda 2-3 muajve të ardhshëm.

Të paktën, kjo është ajo që thotë Kushtetuta, e cila sanksionon vetëm gjendjen e luftës, si të vetmen arsye për të shtyrë përtej katër viteve mandatin e skaduar të një qeverie.

Nëni 65 i Kushtetutës specifikon se “Kuvendi zgjidhet çdo 4 vjet. Mandati i Kuvendit fillon me mbledhjen e parë të tij pas zgjedhjeve dhe përfundon në të njëjtën datë të të njëjtit muaj të vitit të katërt nga data e mbledhjes së parë. Në çdo rast, Kuvendi qëndron në detyrë deri në mbledhjen e parë të Kuvendit të ri të zgjedhur”.

Është neni 66, ai që specifikon përjashtimet nga ky rregull. “Mandati i Kuvendit zgjatet vetëm në rast lufte dhe për aq kohë sa vazhdon ajo. Kur Kuvendi është i shpërndarë, ai rithirret vetiu”.

Kushtetuta nuk njeh asnjë arsye tjetër për shtyrjen e zgjedhjeve.

Nga ana tjetër, afati i mbajtjes së zgjedhjeve përcaktohet qartë në Kodin Zgjedhor. Neni 8 i këtij Kodi përcakton se: “Zgjedhjet e përgjithshme për Kuvendin apo për njësitë e qeverisjes vendore zhvillohen njëherësh në të gjithë territorin e vendit brenda periudhës që shtrihet nga 15 marsi deri më 30 qershor ose nga 15 shtatori deri më 30 nëntor”.

Me zgjedhjet e vitit 2013 që u zhvilluan në datën 23 qershor, në përputhje me specifikimet e Kushtetutës dhe të Kodit Zgjedhor, harku kohor për mbajtjen e këtyre zgjedhjeve të përgjithshme shtrihej nga 15 marsi në 30 qershor, e Presidenti Nishani dekretoi nëntë muaj përpara përfundimit të mandatit datën e zgjedhjeve në 18 qershor.

Në këto kushte, vetëm dorëheqja e papritur e kësaj qeverie (çka do të afronte datën e zgjedhjeve) apo shpallja e luftës nga ana e Shqipërisë apo nga ana e një shteti të dytë ndaj Shqipërisë, mund të ndryshojë 18 qershorin si data në të cilën shqiptarët do të votojnë për mandatin e ardhshëm qeverisës.

Ajo që bën përshtypje është se si për interesa vetjakë dhe politikë, lidershipi i Partisë Demokratike, mes të cilëve vetë kryetari që ka formim juridik, nuk njohin saktë nenet e ligjit themeltar të vendit. /Lexo.al

Redaksia Online
l.q/Shqiptarja.com