KESH nis eksportin për ruajtjen e
nivelit të Fierzës, fiton 2.5 mln euro

Që nga ora 00:00 e ditës së mërkurë, ka nisur eksporti i energjisë elektrike që prodhon sistemi hidroelektrik i vendit, kryesisht nga kapacitetet prodhuese të kaskadës së Drinit, që operohen nga KESH.

Korporata Elektroenergjetike Shqiptare ka kryer një tender ditën e martë, duke kontraktuar shitje të energjisë së prodhuar për të paktën dy javët e ardhshme. Çmimi është pranuar në nivelin 38.5 euro për megavatorë. Me këtë çmim, KESH do të rritë të ardhurat e veta për 15 ditë në masën 2.5 milionë euro.

Nisja e eksportit të energjisë është jo vetëm me interes financiar. Sekretari teknik i digave të larta vendosi pak ditë më parë që, në kushtet e reshjeve të dendura, niveli i ujit në Fierzë të mos kalojë 291 metra mbi nivelin e detit, për të shmangur rrezikun e përmbytjeve.

Aktualisht prurjet në ujëmbledhësin e Fierzës, që shërben si rregullator edhe për dy HEC-et e tjerë mbi Drin, janë 500 metër kub ujë në sekondë, por me perspektivën që të rriten sërish.
 
Redaksia Online
(a.h/shqiptarja.com)