Kina dhe Rusia duan të ndërtojnë ‘rendin e ri ndërkombëtar’, Putin takim me Xi Jiping në Uzbekistan këtë javë

Kina dhe Rusia janë të gatshme për të formësuar një rend të ri ndërkombëtar. Kështu bëri me dije një diplomat i lartë kinez, ndërsa njoftoi takimin e presidentit rus Vladimir Putin me homologun kinez Xi Jiping në Uzbekistan këtë javë.

Agjencia France-Presse shkruan se Kina dhe Rusia janë afruar më shumë vitet e fundit, si pjesë e asaj që ata e quajnë një marrëdhënie "pa kufij" që vepron si një kundërpeshë ndaj dominimit të Shteteve të Bashkuara.

Të hënën, shefi i punëve të jashtme të partisë komuniste, Yang Jiechi, i tha ambasadorit rus në Kinë, Andrey Denisov, se Kina ishte “e gatshme të punonte me Rusinë për të zbatuar vazhdimisht frymën e bashkëpunimit strategjik të nivelit të lartë midis dy vendeve, e për të mbrojtur të përbashkëtat, interesat e të dyja palëve, për të nxitur zhvillimin e rendit ndërkombëtar në një drejtim më të drejtë dhe më racional”.

Rusia ka kërkuar të forcojë lidhjet me vendet aziatike, veçanërisht me Kinën, që kur u godit me sanksione të ashpra perëndimore për pushtimin e Ukrainës. Duke rritur tensionet midis Kinës dhe perëndimit, Pekini nuk i ka dënuar ndërhyrjet e Moskës në Ukrainë.

D.GJ/Shqiptarja.com

TAG:
• rusia
• SHBA