Kompania ‘Arbri Garden’, e cila u vu sot në qendër të vëmendjes, pasi kishte porositur sasinë më të madhe të kokainës nga Kolumbia drejt vendit tonë, rezulton se ka kryer dhe herë të tjera porosi të tilla. Në dokumentin që Report Tv iu sjell më poshtë, thuhet se kompania ‘Arbri Garden’ qe nga viti 2012 (vit kur eshte regjistruar ne QKR) e deri me sot, ka marrë  97 ngarkesa nga Amerika e Jugut.

Dërgesat janë kryer përmes agjencisë doganore ‘Panjiva’, ndërsa nuk është konfirmuar që ndonjë nga importet e mëparshme ka pasur dërgim droge. “Panjiva organizon dhe indekson të dhëna të marra nga burime të treta të ndryshme, kryesisht agjenci doganore, por gjithashtu burime të informacionit tregtar si Dun& Bradstreet, ZoomInfo, dhe Kompass. Platforma e Panjiva grumbullon këto burime të ndryshme të dhënash për të prodhuar informacion mbi kompani dhe agjentë të tjerë angazhuar në tregti ndërkombëtare”- thuhet në faqen e ‘Panjiva’, e cila ka dhënë edhe informacionin për ‘Arbri Garden’.

Pra, janë plot 97 dërgesa nga kompania ‘Arbri Garden’ drejt Shqipërisë, kompani që njihej për tregun e reklamave, të luleve, ishte me disa funksione, por kryesorja ishte ajo e frutave ekzotike, kryesisht e bananeve.

Ditën e sotme, është kapur sasia më e madhe e kokainës, e cila vinte nga Kolumbia, dhe nëse shitej në treg kapte vlerën e rreth 180 milionë euro. Policia ka shpallur në kërkim pronarin e kompanisë që porositi kokainën, Arbër Çekaj, i cili mësohet se ka pasur dijeni për trafikun e lëndës narkotike nga vendet e Amerikës drejt Shqipërisë.

Ndërkohë, vijon hetimet për të zbardhur skemën e plotë të këtij rrjeti të gjerë të trafikut të kokainës dhe kapjen e ‘kokave’ të trafikut, si dhe për të zbuluar nëse në ndonjë nga 97 dërgesat e mëparshme të kësaj kompanie është trafikuar lëndë narkotike. 

kompaniaa
(Dokumenti që tregon se kompania mori 97 dërgesa nga Amerika e Jugut)

d.c./shqiptarja.com