Kokëdhima-Berisha "duel" sy më
sy: Përballë të majtës, je një hiç

TIRANE- Për herë të parë është ngritur dje në foltoren e Kuvendit, deputeti i PS-së Koço Kokëdhima, i cili i ka kthyer përgjigje akuzave të ish-Kryeministrit Berisha, që pothuajse gjatë gjithë seancës maratonë, ka akuzuar Kryeministrin për afera me deputetin biznesmen Kokëdhima.

“Janë 20 vjet që jam përballë Berisha dhe Nano” ka kujtuar Kokëdhima, ndërsa me një ton të ashpër, i ka cilësuar të gjitha shpifje edhe për rastin e një ndërtimi të ngritur në Qeparo mbi të cilin gazeta “RD” dhe “PD” ka filluar një fushatë kundër tij, duke pretenduar që ndërtimi është prona e tij dhe kryeministrit Rama.
 
Kokëdhima ka shpërthyer në akuza të drejtpërdrejta ndaj Berishës, duke ngritur deri edhe gishtin nga foltorja e duke i bërë të qartë se nuk ka asnjë lidhje me pronat apo pallatet që i përmenden në bregdet. Por, këtu debati nuk ka përfunduar, sepse Berisha është ringritur me akuza shtesë dhe Kokëdhima po ashtu, me një sulm të ri ndaj Berishës.
 
Por debatet janë ndezur edhe më tej, kur ish-kryeministri Berisha tha se "nëse banorëve në Himarë e Xarë do t'u preket një fije flokut, do të mbajë përgjegjësi Rama e Kokëdhima".
 
Në replikë, deputeti Kokëdhima i tha Berishës të mos bëjë shantazhe, duke u shprehur se "vetë ish-kryeministri Berisha do të mbajë përgjegjësi për abuzimet me pasuritë e shqiptarëve". Debatet janë ndalur tek situata e krijuar me Albpetrol, ndërsa ka pasur akuza ndaj të dyja palët për abuzime.

REPLIKAT BERISHA - KOKEDHIMA
Menjëherë pas Subashit, në foltore është ringjitur ish-Kryeministri Berisha duke përsëritur akuzat ndaj Kryeministrit Rama dhe biznesmenit Kokëdhima për “kështjella” të ngritura në fshatrat e bregdetit dhe nxjerr fitime nga prishjet në bregdet, ç'ka ka ngacmuar deputetin Kokëdhima dhe e ka detyruar atë të replikojë për herë të parë me të. Ja replikat ndërmjet tyre:

KOKËDHIMA: SHPIFJET QE BERISHA I SAJOI, S'KANE LIDHJE ME MUA
Shpifjen që e sajoi vetë në mëngjes, po na e nxjerr si një burim jashtë vetes. Vite me radhë ky zotëri e ka përdorur për të përbaltur ata që ka përballë. Qindra shpifje dhe përgojime ka bërë për punën time dhe të kompanive  të mia. Sot përmend gjëra me të cilat s’kam asnjë lidhje. Në bregdet jetojnë njerëzit e mi, kushurinjtë, vëllezërit, njerëz të mbiemrit tim. Nuk them as që më dëgjojnë, as që nuk më dëgjojnë,  se ata bëjnë jetën e tyre.

Kanë shpikur lloj-lloj gjerash ndaj meje, por asgjë nuk kanë ndjekur në rrugë ligjore; nuk keni fituar asnjë proces ligjor ndaj meje. Unë jam bazuar tek ligji e ju tek shpifjet. Më parë kjo histori me shqetësonte, pasi nëna ime është në moshë të thyer dhe sa herë shihte televizorin, trembej nga Saliu, se e mendonte si Enveri që të bën gjëmën. Dhe nuk e dinte se si ishin shprehjet e këtij personi. Dhe sot që më ndjek, i them mos ki frikë nga shpifjet e Saliut, por jeto e qetë, se populli ka shpëtuar prej tij. E “bathorizuat” gjithë bregdetin e vendit. Ju jeni përgjegjës për kontrollin dhe zhvillimin e territorit. Qeveria jonë nuk ka një fushatë prishjesh dhe shkatërrimi në bregdet, por një fushatë dhe plan për ta rindërtuar atë; për ta rikthyer mundësinë që ai vend i begatë dhe ai popull që jeton në bregdet të mos jetë i varfër siç e katandisët ju, por të jetojë më pasuritë e veta. Projekti që zbatohet tani në Himarë synon përmirësimin e zonës dhe shërimin nga ndërtimet e dëmshme, që dëmtojnë këtë territor. Po merreni me shpifje si gratë e liga, nuk morët kurrë përgjegjësi për rolet që morët në këtë vend.  Këta drejtues dhe gjyqtarë të këtij vendi u sollën si pushtues dhe jo në shërbim të këtij vendi. Nuk bie asgjë nga hetimi i administratës dhe gjykatësve. Ju përfituat gjithë këto vite nga përçarja e të majtës, por nuk do të përfitosh më. Ka perënduar koha jote, përballë të majtës së bashkuar do të jesh një hiç.

BERISHA: PO I LUAJTI NJE FIJE FLOKU NDOKUJT NE HIMARE, DO JENI PERGJEGJES
Kështjella në Himarë ose është e Ramës dhe e tij apo e Gramozit dhe e Cacit, por s’kam asnjë fakt t’ua faturoj atyre. Por është e Ramës dhe e Koços. Vetëm në 3 muaj është gjashtëfishuar ky ndërtim. Kam një jetë të gjatë në politikë dhe nuk kam parë kurrë politikanë që të çojnë shkresa në dogana. Këtë e ka bërë vetëm Kokëdhima, që është i çmendur pas naftës. Me ndërhyrjen e tij patologjike në dogana përpiqet të rivendosë pozitën si të vjedhë në tokë, në det, në ajër. Është dhjetëfishuar squfuri. Sot në Xarë fshatarët janë ngritur në protestë, akuzojnë Ramën e Kokëdhimën se duan t’u marrin tokën për ato planet e veta. Shikoni dy kullat binjake që kanë ngritur në Himarë; himarjoti që s’e lidh asgjë me atë zonë, përveçse vjedhjet e bëra aty. Shkoni shikoni si i ka lidhur sytë me shami, Himarës, me dy kulla. I ka zënë gjithë pamjen. Me dy kulla, Koçua i lidhi sytë Himarës. Çdo prishje në bregdet ka vetëm inatet primitive të dy njerëzve që quhen Edi Rama dhe Koço Kokëdhima. Një qime floku po i luajti kujt në atë zonë, ju të do jeni përgjegjës.

KOKËDHIMA-BERISHES: MOS ME BEJ SHANTAZH, DO PERGJIGJESH QE KE LUAJTUR ME PASURITE E SHQIPTAREVE
Zotëria këtu i mori pasuritë e naftës popullit shqiptar dhe asnjë të ardhur nuk përfitoi buxheti i popullit shqiptar nga pasuritë e veta nëntokësore. Ia dha të gjithë atyre më të cilët ndante interesat. Mos më trego gishtin mua dhe mos më bëj shantazhe. Ti do përgjigjesh. Ti ke luajtur me pasuritë e shqiptarëve. Ti do përgjigjesh për këto krime këtu. Ky punon si makineri, vetëm shpif, nuk funksionon në marrje. Tani Albpetroli paguan fitim në buxhetin e shtetit e taksa, gjë që nuk e bënte në qeverisjen tuaj. Vetëm këtë vit Qeveria jonë ka ndryshuar të gjitha kushtet prej koncesioneve të tua, ku përfituan të gjithë përveç shqiptarëve. Nuk kanë asnjë lidhje me të vërtetën ato që thoni ju. Si deputet në Xarë po punoj për nxitjen e punës, për të bërë prodhime konkuruese,dhe jo për t’i katandisur siç ndodhi në qeverisjen tëndë. I ke lënë pa zot shqiptarët dhe flet për liri ti. Z. Berisha, kam menduar gjithmonë që kuvendi yt është i ulët që të bëj debat më ty, pasi ti nuk ke etikë dhe shpif.

BERISHA-KOKEDHIMES: TREGON PERRALLA, NUK KA DET QE LAN MEKATET E TUA E TE EDI RAMES
Parafolësi ua la në shpinë kullat e Himarës, kështjellat e Qeparoit. Prrallisi për çdo gjë, po nuk foli për to. Mashtrimi i ka këmbët e shkurtra. Rentën e naftës e ka vendosur Qeveria ime 4-5 vjet përpara. Ato përrallat që tregon ti këtu, s’ti beson asnjë nga këta. Këta donin të të dëgjonin për kullat e Himarës, kështjellat e Qeparoit, vjedhjet në naftë. Kur erdhëm ne në pushtet, prodhimi i naftës arriti në 1 milion ton. Nuk ka det që të lan mëkatet me Edi Ramën. Jeni një kopje totale me Edi Ramën.