Kolaudoi 'përbindëshin' në Durrës, Apeli mbyll dosjen për Arben Qaton e LSI-së dhe ndërtuesin e resortit 'Kamelia'

Gjykata e Apelit Durrës, ka vendosur të pushojë çështjen penale në ngarkim të Arben Qatos, inxhinierit, që i doli emri si një nga kolauduesit abuzivë të ndërtimeve pa lejë në qytetin e Durrësit dhe zonën e Golemit.

Qato ka qenë ish-kandidat për deputet të LSI-së në qarkun Durrës në zgjedhjet parlamentare të 2017. Si pasojë e kolaudimeve të falsifikuara dhe jo të drejta, por dhe punimeve të dobëta që kishte kryer në hotelin e tij “Vila Palma” në Golem, Arben Qato, në tërmetin e 26 nëntorit 2019 humbi ndërtesën buzë detit, ku nga shembja mbeti i vdekur babai i tij Sadik Qato dhe fatmirësisht shpëtoi njëri nga djemtë e tij.

Qato, ishte marrë i pandehur nga prokuroria e Durrësit, pasi ka kryer kolaudimin e objektit shumë katësh që ndodhet në zonën e “Shkëmbit të Kavajës” dhe që njihet ndryshe si kompleksi “Kamelia”. Për kolaudimet fiktive dhe jo reale, Arben Qato në muajin korrik 2019 është marrë i pandehur, e cila kishte ngritur ndaj tij akuzën e “Shpërdorimit të detyrës”.

Qato në cilësinë e inxhinierit kolaudues, ka kryer kolaudimin e pallatit “përbindësh” në Golem që quhet kompleksi “Kamelia”, që pas kolaudimit nga Qato, pronari i pallatit solli dhe shumëfishimin e kateve. Sipas prokurorisë ky kolaudim është kryer në muajin Maj 2012, duke shkelur të gjitha rregullat e urbanistikës dhe pa pasur asnjë dokumentacion konkret për objektin ekzistues.

Në këtë çështje penale veç Arben Qatos i pandehur për “Ndërtim pa leje” ishte marrë dhe pronari i “përbindëshit” “Kamelia”, Enver Shala, e bashkë me të dhe ish-kryekomunari i Rrashbullit, Hysen Gashi, Merita Zeqaj, Valentin Stanaj, Alketa Blakaj dhe shoqëria "Universal Engineering 08" shpk.

Por tashmë akuzat ndaj këtyre personave janë rrëzuar, pasi gjykata e Apelit Durrës, vendosi të pushojë ndjekjen penale kundër të pandehurve të prokurorisë.

1. Pushimin e procedimit penal në ngarkim të pandehurit Enver Shaba
2. Pushimin e procedimit penal në ngarkim të pandehurit shoqeria "Shala-E-CO"
3. Pushimin e procedimit penal në ngarkim të pandehurit Hysen Gashi
4. Pushimin e procedimit penal në ngarkim të pandehurit Arben Qato
5. Pushimin e procedimit penal në ngarkim të pandehurës Merita Zeqaj
6. Pushimin e procedimit penal në ngarkim të pandehurit Valentin Stanaj
7. Pushimin e procedimit penal në ngarkim të pandehurës Alketa Blakaj
8. Pushimin e procedimit penal në ngarkim të pandehurit shoqëria "Universal Engineering 08"

Kompleksi Kamelia në 2007

Kompleksi Kamelia në 2018

Akt koalidimi i kompleksit Kamelia

E.M./Shqiptarja.com

TAG:
• Durres
• gjykata e apelit
• sadik qato
• arben qato