Kolegji zgjedhor zyrtarizon Donald
Trump si president të SHBA-ve

Kolegji zgjedhor në SHBA, ka zyrtarizuar sot presidentin e ri të Amerikës, Donald J. Trump, duke e bërë kështu personin e 45-të  që do të mbajë këtë post.

Trump ka marrë më shumë se  270 vota në votimin e delegatëve dhe kaq kanë mjaftuar që ai të zyrtarizohet si President i Shteteve të Bashkuara të Amerikës.

Në reagimin e tij për fitore, Trump është shprehur se do të jetë presidenti i të gjithë amerikanëve.

Sipas raportimeve të BBC, delegatëve u janë dërguar mesazhe dhe janë telefonuar për të mos votuar zgjedhjen e Trump.

Ndërkohë rezultati  zyrtar i votimit të delegatëve do të bëhet publik më 6 janar 2017 dhe më 20 janar Trump bën betimin si President i SHBA-ve.

Trump ka arritur të marrë më shumë  se 270  vota nga 538 delegatët, ku sipas rezultatit elektoral ai duhet të kishte marrë 306.

Në shumicën e rasteve votimi në Kolegjin zgjedhor është një formalitet, por këtë vit pas akuzave se Rusi mund të kishte manipuluar zgjedhjet shumë amerikan i kanë kërkuar  Kolegjit që mos ta votonin republikanin po të zgjidhnin një kandidat tjetër më të pranueshëm ose të votonin për Clinton.

Sipas legjislacionit amerikan, çdo delegat i Kolegjit duhet të votojë për kandidatin i cili ka fituar në shtetin përkatës, por nuk kanë munguar rastet që delegatët kanë votuar një kandidat tjetër. Edhe në votimin e Trump, kjo gjë nuk mungoi.

Mësohet se dy prej delegatëve që pritej të votonin për Trump, kanë votuar kundër tij. E njëjta gjë ka ndodhur edhe me 4 demokratë të cilët priteshin të votonin për Hilary Clinton.

Nëse në Kolegjin zgjedhor kandidatët do të merrnin vota të barabarta , atëherë çështja do të kalonte në Dhomën e Përfaqësuesve për të zgjedhur presidentin e ardhshëm.

Redaksia Online
D.T/Shqiptarja.com