Kompania paguan 1590 euro
qindra aplikime nga Shqipëria

Një kompani italiane me aktivitet në prodhimin e makinerive bujqësore, e cila kishte bërë një thirrje për vende të lira pune, por prej gjashtë muajsh nuk kishte marrë asnjë aplikim edhe pse ofronte një pagë minimale prej 1590 eurosh në muaj, gjatë fundjavës është “mbytur” nga aplikimet për pozicionet e lira të punës.

Shumë të papunë por edhe shumë persona të cilët kanë një kualifikim dhe ëndërrojnë për një karrierë të suksesshme, kanë aplikuar për të marrë një vend pune në këtë kompani.

Mediat italiane shkruajnë se gjatë ditës së shtunë dhe  ditës së dielë sajti i kompanisë “Antonio Carro” është bllokuar nga dërgesat e shumta të CV.

Një CV pas një tjetre nga Shqipëria dhe Sicilia dhe mëngjesin e ditës së djeshme, 10 persona kanë qëndruar jashtë derës së kompanisë me CV e tyre në duar.

Ky efekt erdhi pas apelit të bërë nga  kompania e cila aktualisht ka 380 punëtorë, por nuk arrinte të plotësojë nevojat e saj, pasi ka nisur një plan 3- vjeçar për tu zgjeruar.

Redaksia Online
D.T/Shqiptarja.com