Ministria e Infrastrukturës dhe Energjisë u mblodh sot komisionin e dhënies me koncesion të procedurës me objekt “Përmirësimi, ndërtimi, operimi dhe mirëmbajtja e Rrugës së Arbrit”. Sipas Ministrisë së Transporteve, nga shqyrtimi i sistemit elektronik, rezultoi se kishin shprehur interes 3 (tre) operatorë ekonomikë dhe konkretisht operatori Ekonomik Adem Pojani, shoqëria “Alb-Star”sh.p.k. si dhe operatori Ekonomik Shoqëria “Gjoka Konstruksion” sh.a.

Kjo e fundit ka përmbushur kushtet e pjesëmarrjes në tender si dhe ka paraqitur vlerë financiare të projektit prej 33 miliardë lekë. Në përputhje me përcaktimet ligjore, Ministria e Transporteve sqaron se brenda afatit ligjor 60 ditor, komisioni do të kryejë shqyrtimin e plotë dhe të detajuar të ofertave të paraqitura dhe do të dalë me vendimmarrjen përkatëse.

Njoftimi i Ministrisë së Transporteve:

1) Operatori Ekonomik Adem Pojani 
Nga shqyrtimi paraprak i sistemit, rezultoi se ky operator kishte paraqitur disa dokumenta, të cilat nuk rezultojnë të mjaftueshme për t'u konsideruar ofertë zyrtare;

2) Operatori Ekonomik Shoqëria “Alb-Star”sh.p.k.
Nga shqyrtimi paraprak i sistemit, rezultoi se ky operator kishte paraqitur disa dokumente, por nuk u konstatuan të dhënat e ofertës financiare.

3) Operatori Ekonomik Shoqëria “Gjoka Konstruksion” sh.a;

Nga shqyrtimi paraprak i sistemit, rezultoi se ky operator kishte paraqitur dokumentacionin teknik, financiar dhe ligjor si dhe kishte paraqitur Propozim Financiar. Nga shqyrtimi paraprak i Propozimit Financiar rezultoi se Operatori Ekonomik Shoqëria “Gjoka Konstruksion” sh.a; kishte propozuar si vlerë projekti shumën prej 33,6 miliardë lekë.

Në përputhje me përcaktimet ligjore, brenda afatit ligjor 60 ditor, komisioni do të kryejë shqyrtimin e plotë dhe të detajuar të ofertave të paraqitura dhe do të dalë me vendimmarrjen përkatëse.

Redaksia Online
l.q/Shqiptarja.com