Shqipëria mbyll 3 kapitujt e parë të negociatave me BE! Rama: Vlerësim i qartë për rezultatin e reformave! Marta Kos: Protestat në Tiranë nuk ndikojnë në procesin e anëtarësimit

Ligji i investimeve strategjike do të shfuqizohet, tha kryeministri Rama në Konferencën Ndërqeveritare. Në bashkëpunim me Komision Europian, po hartohet ligji i ri ndërsa vlerësoi mirëformulimin e ligjit për zonat e mbrojtura. Megjithatë, ky i fundit do të pësojë disa ndryshime që të jetë në përputhje të plotë me standardet europiane.

“Na duhet të shfuqizojmë ligjin e investimeve strategjikë sepse ky ligj e ka përmbushur misionin e vet dhe po punojmë ngushtësisht me Komisionin për atë që do ta shfuqizojë. Na duhet ta trajtojmë ligjin mbështetur në të gjitha standardet europiane dhe të ndryshojmë gjithçka që s’është në pajtim me standardet europiane. Shfuqizimi nënkupton anulim. Ligji për zonat e mbrojtura është një nga ligjet më të mira që kemi, kemi punuar shumë fort. Na duhet të trajtojmë pjesë specifike që duhet të jenë në pajtim të plotë me BE, edhe për këtë po punojmë me Komisionin. Shfuqizim nuk është një fjalë që e marrim si fjalë për të qenë në përputhje, është miratim 100% me standardet”, tha Rama.

I pyetur në Konferencën Ndërqeveritare për projektin e Zvërnecit dhe debatet që ka ngjallur në Parlamentin Europian, kryeministri Rama tha se Komisioni Europian është në dijeni të çdo zhvillimi. Gjithashtu siguroi se projekti do të kryhet sipas standardeve më të larta dhe do të jetë krenari për vendin dhe Europën.

“Nga vitet e gjata në detyrë, kur thua Bruksel është fjalë shumë komplekse. Për ne të gjithë zërat janë mjaft të respektueshëm, por ka një fjalë që e marrim shumë seriozisht, zëri i Komisionit. Komisioni është në krye të gjithçkaje duke qenë shumë i mirëinformuar bazuar në fakte. Në këtë botë informacioni dhe pikëpamjeve të debatueshme ku e vërteta gjen gjithnjë e më pak hapësirë, komisioni mbetet në fakt ai që mban fort objektivitetin sepse punon bazuar në fakte, të dhëna, burime të verifikuara. Jam i sigurt që edhe ju, nëse do të kishit interes për faktet, për të dhënat, burimet e verifikuara do të kuptonit se nuk ka asgjë për t’u shqetësuar. Projekti është ende punë në vazhdim. Projekti nuk mund të shihet askund sepse s’është finalizuar. Vlerësimi i ndikimit në mjedis është në proces e sipër. Gjithçka po bëhet sipas rregullave që prej ditës së parë. Përmendja e emrave nuk është diçka që na ndihmon për të shkuar tek  e vërteta. Për ne vlen libri i rregullave të standardeve të anëtarësimit dhe Komisionit të BE. Ideja që Shqipëria do të vazhdonte përpara me diçka që nuk do të ishte në përputhje të plotë me librin e shenjtë të besimtarëve ateistë në Shqipëri është pretendim pa bazë. S’ka asgjë për t’u shqetësuar. Do të bëjmë një projekt që do të jetë krenari për Shqipëri dhe Europën. Kjo është ambicia ime. Shqipëria duhet ta bëjë realitet për vete dhe Europën. Do të jemi rigorozë për të mos kërkuar asgjë veç standardeve më të larta”, tha kryeministri.

“Mbrojtja e mjedisit është pjesë e kritereve të anëtarësimit në BE dhe aktualisht ka një sërë ligjesh që duhen ndryshuar për të përmbushur këtë kriter. Para se të nisin protestat, kishim rënë dakord me qeverinë shqiptare që të shfuqizoheshin amendamentet e vitit 2024 për zonat e mbrojtura dhe për investimet strategjike. Procesi i anëtarësimit është në vazhdimësi. Kapitulli 27 është më kërkuesi, dhe jo vetëm për shkak të kësaj proteste, por më së shumti se Shqipëria duhet të harmonizojë legjislacionin”,- tha Marta Kos.

"Ajo çfarë është e rëndësishme është që deri më tani jemi në drejtimin e duhur me kalendarin tejet ambicioz që është diskutuar dhe për të cilin është rënë dakord në ndërveprimin tonë me Komisionin. Dhe falë detyrave të pareshtura të shtëpisë që kemi bërë deri tani, ky kalendar bëhet gjithmonë e më ambicioz dhe ne duhet të punojmë gjithmonë më tepër, pareshtur.

Nëse atmosfera do të vazhdojë të jetë ajo çfarë kemi përjetuar gjatë kësaj periudhe të fundit, çdo gjë do të jetë aty ku duhet dhe çdo detyrë shtëpie do të bëhet si duhet. Deri tani nuk kemi ndonjë arsye të besojmë se do të ketë një ndryshim të atmosferës.

Dje në takimin e Koalicionit të Vullnetshëm patëm edhe një qasje për këtë proces, për vendet që janë në negociata aktive, dhe të gjithë janë të prirur që të shkojnë përpara, dhe të gjithë janë të prirur të gjejnë mënyra edhe më të shpejta për ta vlerësuar këtë. Gati për të ecur përpara dhe për t’u përballur edhe me sfidat nëse shfaqen.

Siç e thashë, presidenca irlandeze na jep komfort, sepse Irlanda është një vend që ka dëshmuar se progresi eksponencial është i mundshëm dhe se irlandezët nuk pranojnë asgjë përveç ekselencës si objektiv.

Të jesh i shkëlqyer në objektivin e presidencës do të thotë të mbyllësh më shumë kapituj me ne dhe të tjerët në fund të vitit",-tha Rama.

“Është një super e martë për zgjerimin”, tha Marta Kos duke vlerësuar punën e Shqipërisë për anëtarësimin në BE. Ajo shtoi se qytetarët europianë e kanë përkrahur zgjerimin, teksa garantoi se Shqipëria do të ketë mbështetjen e saj derisa të përfundojë mandatin.

“Universitetet shqiptare janë pjesë e kërkimit europian. Përgëzime të gjithë miqve tanë shqiptarë për punën e tyre dhe për këtë arritje. Ne mbështetemi te Shqipëria për të vazhduar për të këmbëngulur në reforma thelbësore. 94% e qytetarëve mendojnë se zgjerimi do të sjellë më shumë avantazhe. Udhëheqja politike dhe mbështeteja publike janë përtej dyshimit, një recetq shumë e fortë për sukses. Është në dorën tuaj që të jepni rezultate për qytetarët shqiptarë. Do të jem krah jush deri në fund të mandatit tim”, tha Kos.