ARSYETIMI
Letra, që publikohet nga CEZ Group, e që i është dërguar më 26 mars institucionit financiar ndërkombëtar, e fton këtë të fundit të ndërmarrë hapa të duhur për të parandaluar marrjen e fondit të garancisë, siç është rënë dakord në kontratën e privatizimit të të vetmit operator në këtë sektor, më 2009. Arsya kryesore për këtë veprim është, veç të tjerash, sipas CEZ-it, fakti që Enti Rregullator në Shqipëri ka vendosur të rritë për këtë vit 91 për qind tarifën e shitjes për energjinë e prodhuar nga kompania me pronar shtetin, që ka monopolin si furnizues për CEZ Shpërndarje. Ndërkohë, Enti Rregullator nuk e pasqyroi këtë rritje tarifore në asnjë lloj mënyre në çmimin për konsumatorin, duke e ngarkuar me një barrë të rëndë kompaninë tonë.
Që nga janari 2012, CEZ Shpërndarje po pëson humbje, që shtohen çdo ditë e më shumë, shtohet në letër.
NEGOCIATAT
Më tej, në të vihet në dukje se, pas javë të tëra negociatash, u arrit një marrëveshje midis CEZ Shpërndarjes dhe qeverisë shqiptare për të likuiduar nga të dy drejtimet pagesat e prapambetura, pra ato që CEZ u detyrohet institucioneve qeveritare dhe qeverisë dhe anasjelltas. Zbatimi i marrëveshjes u kushtëzua me një kërkesë që mbajtësi i shumicës së aksioneve të CEZ Shpërndarjes të investonte fonde shtesë në kompani, duke përfituar në shkëmbim rishikimin e vendimit të tarifave. Për fat të keq, asnjë kusht i pranueshëm rregullator nuk është vendosur, në mënyrë që të siguronte kthimin e investimeve të kryera. Kështu, CEZ Shpërndarje po shkon drejt vënies dorë mbi garancinë, e caktuar nga Banka Botërore, në rast se qeveria shqiptare nuk do të respektonte detyrimet e saj rregullatore, për të cilat është angazhuar kur operatori i vetëm i shpërndarjes së energjisë elektrike në vend u privatizua, në vitin 2009.
NDËRHYRJA
CEZ Shpërndarje i ka dërguar një letër Bankës Botërore, duke e vënë në dijeni të situatës së krijuar dhe duke ftuar zyrtarët e saj që të marrin masa në mënyrë që të mos arrihet deri në tërheqjen e garancisë me vlerë 60 milionë euro. Në të njejtën kohë, drejtuesit e CEZ Shpërndarje kanë qenë të detyruar për të reaguar ndaj kësaj situate, të krijuar si pasojë e vendimeve të marra nga Enti Rregullator, duke njoftuar autoritetet shqiptare dhe furnitorët e saj lidhur me vështirësitë financiare, me të cilat po përballet.
DETYRIMET
Ka disa mekanizma rikuperimi, që CEZ mund të përdorë në rastin e kompanisë shqiptare të shpërndarjes. CEZ-i apo kompania e saj shqiptare e shpërndarjes mund të kërkojë nga qeveria shqiptare kompensimin e të gjitha humbjeve dhe dëmeve, që janë shkaktuar si pasojë e rritjes së tarifave nga ana e Entit Rregullator. Sidoqoftë, një pjesë e kompensimit të mundshëm është e siguruar nga garancia e vendosur prej Bankës Botërore. Në rast se situata nuk zgjidhet në ditët që pasojnë, garancia e Bankës Botërore mund të merret dhe të përdoren mekanizma të tjerë rikuperimi, kërcënojnë drejtuesit e CEZ-it.
CEZ nuk është e lumtur nga hapat që janë ndërmarrë, megjithatë ajo ka detyrimin që të mbrojë vlerat e kompanisë për investitorët dhe aksionerët e saj. Paralelisht me këto hapa, CEZ Shpërndarje ka vijuar negociatat me autoritetet shqiptare dhe shpreson të gjejë një zgjidhje miqësore, informon letra.
(gk/im/shqiptarja.com)
![](https://www.shqiptarja.com/template/img/sh_logo1.png)