Një delegacion zyrtar i Kongresit të Shteteve të Bashkuara të Amerikës, i udhëhequr nga Keith Self, kryetar i Nënkomitetit për Evropën në Komisionin për Punë të Jashtme të Kongresit Amerikan, ka vizituar Luginën e Preshevës.

Për aktivistin e çështjes kombëtare që vepron në ShBA, Harry Bajraktari, vizita e Self dhe Suhas Subramanyam është historike dhe një mesazh i qartë se shqiptarët në Preshevë, Medvegjë dhe Bujanoc nuk janë harruar dhe se zëri i tyre dëgjohet në Washington.

Sipas tij, kjo vizitë ka rëndësi të madhe për ruajtjen e paqes, stabilitetit dhe të ardhmes demokratike në rajon, si dhe për avancimin e të drejtave të shqiptarëve në Ballkan.

“Kryetari i Nënkomisionit për Evropën në Dhomën e Përfaqësuesve, Kongresmeni Keith Self, po ndjek hapat e mikut të madh të shqiptarëve, Kongresmenit Eliot Engel, i cili si Kryetar i Komisionit për Punë të Jashtme në Dhomën e Përfaqësuesve, në vitin 2019, pasi vizitoi Beogradin, udhëtoi drejt Luginës së Preshevës ku u takua me shqiptarët atje. Në po atë vizitë, Kongresmeni Engel ishte edhe në Kosovë, ku preu shiritin në inaugurimin e objektit të ri të Ambasadës Amerikane në Prishtinë, si dhe vizitoi qytetin Bajram Curri në Shqipëri”, ka shkruar Bajraktari në Facebook.

Bajraktari shprehu gjithashtu mirënjohjen e thellë ndaj Kongresit amerikan që po vazhdon të mbrojë të drejtat e shqiptarëve, dinjitetin dhe interesat e kombit, përballë një Serbie që vazhdon të ndjekë politika diskriminuese ndaj shqiptarëve.

“Falënderoj komunitetin shqiptaro-amerikan në Texas për punën e madhe që po bëjnë për çështjen kombëtare. Ata janë shembull se si duhet të veprojë diaspora shqiptare. Zoti e bekoftë popullin amerikan. Zoti e bekoftë popullin shqiptar”, shkruan më tej ai.