Por me sa duket testi i drogës po mban larg arritjen e konsensusit për miratimin e një ligji të përbashkët për dekriminalizimin.
Kryetari i komisionit të posaçëm parlamentar Oerd Bylykbashi konfirmoi këtë të martë në një prononcim për mediat se opozita nuk është tërhequr nga kjo pikë kyçe e platformës së demokratëve.
“Askush nuk ka tagër nga aspekti i PD-së që të tërhiqet nga testi i drogës. Është pjesë e një platforme politike të miratuar nga PD-ja në lidhje me çështjet e dekriminalizimit. Ju konfirmojë që PD nuk është tërhequr nga kjo çështje. Nëse do të kishte pasur marrëveshje sot do ta kishim komisionin të mbledhur, do të ishim në fazën e aprovimit. Ne nuk kemi ndërmend që nëpërmjet detajesh ligjore t'i japim mundësinë kriminelëve të ndryshëm të kategorive të ndryshme që të fshihen dhë të gjejnë alibinë për t'u futur përsëri në organet e shtetit qoftë të zgjedhura dhe të emëruara”, ka thënë Bylykbashi.
Komisioni i posaçëm parlamentar për dekriminalizimin e mbyll mandatin e tij në fund të dhjetorit, ndërsa palët politike kanë gjetur dakortësinë pothuajse për të gjithë projektin.
Maxhoranca ka pranuar tashmë propozimin e opozitës për vendosjen e shenjave të gishtërinjve si kusht për zyrtarët në vend. Ndërkaq këto ditë po negociohet për një tjetër propozim të opozitës që ka të bëjë me testin e drogës për të gjithë ata zyrtarë që emërohen apo votohen në poste publike.
Redaksia Online
(u.s/shqiptarja.com)