Kontrolli Mjekësor Bazë do të shtrihet në të gjithë territorin

/ATSH-Z.Tosku/-Drejtori i Fondit të Sigurimit të Detyrueshëm Shëndetësor, Astrit Beci inspektoi zbatimin e programit të Kontrollit Mjekësor Bazë pa pagesë për personat e grupmoshës 40-65 vjeç në qytetin e Lezhës.
Së bashku me kryetarin e Bashkisë së Lezhës, Viktor Tusha, Beci pa nga afër ecurinë e Kontrollit Mjekësor Bazë.
Nga ana e tij, Beci u shpreh se "ky është një nga angazhimet themelore të programit të Qeverisë, me synim përmirësimin e kujdesit shëndetësor për të gjithë personat rezidentë në Shqipëri, si një hap i rëndësishëm për të shkuar drejt mbulimit shëndetësor universal".
Ndërkaq, Beci tha se Kontrolli Mjekësor Bazë do të shtrihet në të gjithë territorin.
Ndërsa sa i përket shërbimeve falas për të gjithë popullatën, Tusha falenderoi Ministrinë e Shëndetësisë dhe Fondin e Sigurimit të Detyrueshëm të Kujdesit Shëndetësorë.
Programi i Kontrollit Mjekësor Bazë Pa Pagesë që nisi në 4 Dhjetor 2014, u shoqërua me një fushatë ndërgjegjësuese "Si Je?"- duke ftuar të gjithë Shqiptarët nga 40-65 vjeç, që një herë në vit, të paraqiten në qendrën e tyre shëndetësore pranë vendbanimit dhe të kryejnë kontrollin shëndetësor bazë pa pagesë.
Në sektorin e Shëndetësisë, qeveria shqiptare mori më 2 Prill 2014 një vendim shumë të rëndësishëm, atë të përcaktimit të mënyrës së realizimit të kontrollit mjekësor bazë për shtetasit e moshës 40-65 vjeç, dhe ky është edhe hapi konkret, drejt kalimit të sistemit të kujdesit shëndetësor në Shqipëri në mbulim universal.