Audioja në Whatsapp për koronavirus/ Ministria e Shëndetësisë: Mesazh dashakeqës si ato që u përhapën për tërmetin

TIRANË- Audioja e shpërndarë në Whatsapp e një vajze, sipas së cilës vjehrra e motrës së saj konfirmonte 12 raste në Shqipëri dhe se shteti e fsheh ËSHTË E PAVËRTETË!  Ministria e Shëndetësisë ka konfirmuar se një informacion i tillë është falso, i cili është shpërndarë nga një person i paidentifikuar ende për motive të paqarta, teksa qetëson të gjithë qytetarët se do të jetë transparente me shifrat në rast se do të ketë persona të dyshuar. Teksa bën thirrje të mos u besojnë asnjë informacioni që vjen në rrugë jo zyrtare, Ministria e cilëson këtë mesazh dashakeqës, duke bërë një paralelizëm me ato thirrje që u përhapën për tërmetin e 26 nëntorit.  

"Të gjitha informacionet që përhapen në rrugë jo zyrtare, në rrjete sociale, media, nuk duhet të merren në konsideratë pasi nuk referojnë situatën reale dhe dëmtojnë mbi të gjitha sigurinë publike duke përhapur panik të panevojshëm. Aq më pak duhen besuar mesazhe zanore dashakeqe, të sajuara dhe hedhur në qarkullim njësoj si ato të pak muajve më parë pas situatës së tërmetit.

Ministria e Shëndetësisë dhe Mbrojtjes Sociale bën me dije se të gjitha informacionet mbi situatën e koronaviriusit publikohen në faqen zyrtare të MSHSH dhe në profilet e saj në rrjete sociale dhe media. MSHMS publikon çdo ditë informacionin zyrtar mbi koronavirusin në përputhje me udhëzimet e Organizatës Botërore të Shëndetësisë.

Ministria e Shëndetësisë rekomandon të gjithë qytetarët që kanë udhëtuar nga vendet e prekura, të telefonojnë në numrin e Urgjencës Kombëtare 127 në rast të shfaqjes së çdo shqetësimi apo shenje klinike", njofton ministria.

G.M./B.K./Shqiptarja.com

TAG:
• ministria e shendetesise
• Koronavirus
• fake per koronavirusin