Kosovë, reagojnë serbët e veriut:
Nuk do bëhemi pjesë e FAK-ut

KOSOVE - Serbët e veriut kanë hedhur poshtë njëzëri lajmin se mbështësin krijmin e Forcave të Armatosura të Kosovës (FAK), raportojnë mediat kosovare. Koordinatori i ekipit të menaxhimit për themelimin e Asociacionit të Komunave Serbe, Ljubomir Mariç, ka mohuar zërat se ai e mbështet krijimin e Forcave të Armatosura të Kosovës dhe pjesëmarrjen e serbëve në të.

“Unë kategorikisht e mohoj dhe hedh poshtë deklaratën si krejtësisht të pavërtetë për mbështetjen e përfaqësuesve të komunitetit serb në Kosovë për idenë e formimit të një të ashtuquajture ‘Ushtria e Kosovës’, si dhe pjesëmarrjen e popullit serb në krijimin dhe funksionimin e saj”, thuhet në deklaratën e Mariçit, transmeton “Blic”.

Kjo deklaratë e tij erdhi pas një letre që Iniciativa Qytetare Serbe kishte dërguar në adresë të disa mediave, ku thuhej se përfaqësuesit e serbëve nga veriu i Kosovës mbështesin idenë për krijimin e zonave të forcave të sigurisë në të cilat do të pasqyrojnë përbërjen etnike të popullsisë.

“Ne paralajmërojmë rreziqet e kësaj deklarate të rreme të sajuar, që ka për qëllim të sjellë kaos dhe të mashtrojë publikun.” tha Mariç

Sipas mediave kosovare, krahas Mariç, në këtë listë bënin pjesë edhe përfaqësues të tjerë të rëndësishëm të serbëve të veriut, si shefi i Qarkut të Mitrovicës, kryetari i Komunës së Mitrovicës Veriore, Këshillat e Përkohshëm të Kuvendit Komunal të Mitrovicës së Veriut, Zveçanit, Zubin-Potokut dhe Leposaviqit.

Ndërkaq ministri për Kosovën në Qeverinë e Serbisë, Aleksandër Vulin, ka deklaruar se Forcat e Armatosura të Kosovës për Serbinë janë krejtësisht të papranueshme. Ai ka thënë se Serbia nuk e ka ndërmend që në kuadër të dialogut, ose në ndonjë mënyrë tjetër, të bisedojë për këtë çështje.

“Janë të gabuarae interpretimet se ne po kërkojmë ndonjë aneks. Ne nuk kërkojmë asnjë aneks të Marrëveshjes së Brukselit. Ne nuk kërkojmë kurrfarë aneksi ose negociata për ushtrinë e Kosovës, s‘ka ushtri Kosova”, ka thënë Vulin.

Ai ka bërë të ditur se Serbia nuk ka hequr dorë nga kërkesa për thirrjen e mbledhjes së Këshillit të Sigurimit të OKB-së  për këtë çështje dhe ka shtuar se nuk varet nga Serbia se kur do të mbahet ajo.

“Përqark Kosovës është situatë krejtësisht e qetë. Serbia nuk do ta sulmojë territorin e vet. As Shqipëria dhe Maqedonia me siguri nuk do ta sulmojnë Kosovën. Nga kush kanë për t’u mbrojtur ata? Ai territor është nën garancitë më të mëdha të bashkësisë ndërkombëtare dhe formimi i çfarëdo ushtrie të Kosovës do të paralajmëronte mundësinë e konflikteve ndëretnike”, ka përfunduar Vulin.


Redaksia Online
(e.c/shqiptarja.com)