Kosova kërkon drejtësi ndërkombëtare
për gratë e dhunuara gjatë luftës

PRISHTINË - Peticioni "Kërkojmë Drejtësi Ndërkombëtare për Gratë e Dhunuara gjatë Luftës së fundit në Kosovë"  do te nis nënshkrimin në 14 korrik, për të vazhduar gjatë pesë ditëve.

Vendimi u mor sot në mbledhjen e Bordit Drejtues të Peticionit, nën drejtimin e zv/kryeministres Edita Tahiri, kryesuese e Bordit. Në këtë takim u vlerësua përkrahja për peticionin e Forumit mbështetës të shprehur në takimin e djeshëm si dhe idetë dhe rekomandimet që dolën nga pjesëmarrësit.

Bordi Drejtues me këtë rast fton të gjithë qytetarët e vendit që të japin kontributin e tyre dhe ta nënshkruajnë në mënyrë sa ma masive këtë peticion, si një formë e shprehjes së fuqishme të mbështetjes për gratë viktima të dhunimeve gjatë luftës në Kosovë, njëherësh duke dërguar mesazh të fuqishëm në të gjithë botën se "Kërkojmë Drejtësi Ndërkombëtare për Gratë e Dhunuara gjatë Luftës së fundit në Kosovë".

Në këtë takim u mor vendim që Eliza Hoxha të jetë anëtare e Bordit drejtues duke marrë për bazë kontributin e sajë përmes artit për këtë çështje të ndjeshme tragjike me projektin për gratë e dhunuara gjatë luftës "Heshtja e këngës".

Qëllimi i peticionit është arritja e drejtësisë ndërkombëtare për gratë e dhunuara gjatë luftës në Kosovë. Krimi gjenocidal që ka prekur mbi 20, 000 gra në Kosovë, ka mbetur ende i pandëshkuar 15 vjet nga përfundimi i luftës. /ATSH/

Redaksia Online
(a.h/shqiptarja.com)