Kosova: U thinja duke ndihmuar 
njerëzit, jo duke i groposur shpresën

TIRANE - Halim Kosova u ka dhënë përgjigje etiketimeve të kryeministrit Rama që e cilëson si të thyer në moshë. Gjatë një takimi me të rinjtë kandidati  i së djathtës për Tiranën tha se thinjat e tij vijnë nga devotshmëria dhe përkushtimi ndaj njerëzve. Kosova premtoi projekt për punësimin e të rinjve.

.....
Tirana u detyrohet shumë të rinjve e kjo duhet të ndryshojë, duke hartuar dhe realizuar projekte punësimi dhe strehimi. Ndërsa ka bashkëbiseduar me të rinjtë e kryeqytetit , kandidati i së djathtës Halim Kosova tha se çdo kërkesë e propozim i të rinjve do të jetë urdhëresë për bashkinë.

“Pa diskutim që petku më i bukur që qyteti i Tiranës ka, është rinia. Eshtë rinia ajo që me iniciativën e saj i ka dhënë gjallërinë e duhur Tiranës drejt një kryeqyteti Europian. Tirana nuk ka bërë aq sa duhet për rininë, duke marrë parasysh sakrificat që rinia ka bërë, duke marrë parasysh se është pjesa më vitale e komunitetit. Tirana ka qenë me fat që në gjirin e saj vijnë qindra e mijëra të rinj për të studiuar, për të krijuar një prespektivë për veten, për familjen dhe pse jo për të gjithë shoqërinë”, tha kandidati për Kryetar Bashkie.

Kandidati për kryebashkiak u pyet nga të rinjtë edhe për sulmet që i bëjnë kundërshtarët politikë.

“Jeni sulmuar për thinjat tuaja , ju si ndjeheni?”, pyet një student. 

“Flokët mund të të thinjen ose mund të të bien. Ajo që unë mendoj është kjo, të të thinjen ose të të bien duke ndihmuar tjetrin, apo të të bien ose thinjen se si ta shkatërrosh tjetrin, t’ia groposësh të ardhurat e tij, t’i groposësh shpresën, ta rrjepësh përditë, është një diferencë shumë e madhe. Unë e them me plot gojën dhe i dal çdo njeriu përballë që thinjat e mia janë devotshmëri, janë përkushtim për pacientin, janë 24 orë në shërbim të tij ashtu sikurse nesër jap zotimin tim se do të jem 24 orë në shërbimin tuaj”,deklaroi Halim Kosova.

Halim Kosova thekson bindjen e tij për krijimin e mundësive, por sidomos parimin e meritës, duhet vlerësuar çdokënd sipas zotësisë që ka.

 “Ju si kryetar i ardhshëm si do të arrini ta garantoni një përfaqësim të denjë në menaxhimin e Bashkisë nga ne të rinjtë?”, pyet një student.

“Ne do shohim të gjitha urat e komunikimit që mendimet tuaja të vijnë në Bashki. Të ngremë organizata të tilla, qoftë edhe me ato struktura e senate që janë krijuar nëpër shkolla, prapë të bëjmë një grup edhe më të madh dhe më të shtrirë, në mënyrë që problemet tuaja të vijnë aty ku duhet për të gjetur një zgjidhje”, u përgjigj Kosova.
“Të rinjtë janë përballë papunësisë. A keni ju ndonjë plan konkret rreth punësimit të të rinjve sot?”, shpreh shqetësimin një student.



“Ne duhet të kthejmë meritën e gjithësecilit në mënyrë që djersa që ju derdhni në fakultete dhe jashtë saj, të justifikohet në jetë. Eshtë shembull shumë pozitiv për çdo njeri dhe nxitës për të ardhmen në qoftë se shikoni që sipas meritës, ti ke edhe mundësi të punësohesh. Bashkia e ardhshme, unë mendoj që duhet të jetë një menaxhere, një ambasadore, një rregullatore midis atyre që diplomohen dhe gjithë bizneseve në vend. Bashkia do të ofrojë grante në mënyrë që kush ka një ide, ose një grup të rinjsh me ide, të kenë mundësinë që atë ide ta vënë në jetë”, u shpreh Kosova.

“Unë do doja të bëja një pyetje rreth një argumenti problematik për të rinjtë e sotëm, që është pikërisht strehimi. Cila mund të jetë zgjidhja juaj duke qenë se kreditë kanë interesa relativisht të larta dhe shumica e të ardhurave tona shkojnë në drejtim të të qerave”, pyet një studente.

“Pa diskutim që kjo lidhet me punësimin dhe punësimi është kryefjala e çdo inisiative që Bashkia do të marrë për rininë. Në një qytet ku biznesit i janë ngurosur 8.000 apartamente që nuk i shiten dhe Tirana ka kaq shumë nevoja për punësim, unë jam duke vrarë mendjen, po brenda kuadrit ligjor, se si këto apartamente t’i ofrohen qytetarit nëpërmjet Bankës me kredi shumë të ulur”,u shpreh Kosova.
 
 Redaksia Online
(Gre.M/Shqiptarja.com)