Kosovë, Bibliotekës Kombëtare i dhurohen koleksione të kolonisë shqiptare të Rumanisë
PRISHTINË, 25 Qershor /ATSH-Behlul Jashari/ - Shoqata e Miqësisë Kosovë - Rumani "Dora D'Istria" i ka dhuruar Bibliotekës Kombëtare të Kosovës "Pjetër Bogdani" një numër të koleksioneve të dorëshkrimeve të rralla të rilindësve shqiptarë të kolonisë shqiptare të Rumanisë.Bëhet e ditur se, donacioni përfshin dorëshkrime të Viktor Eftimiut, libra të vjetër dhe të rrallë mbi prejardhjen e shqiptarëve, kulturën e tyre, fotografi dhe fletore shënimesh botuar që nga viti 1851, të cilat koleksione nuk i kishte më parë Biblioteka Kombëtare e Kosovës.
Drejtori i Bibliotekës, Bedri Zyberaj, me rastin e pranimit të këtij donacioni, i falënderoi përfaqësuesit e kësaj shoqate, kurse kujtoi se këto koleksione janë me interes për historinë dhe kulturën kombëtare, njëkohësisht për ruajtjen e kujtesës kombëtare në institucionin më të rëndësishëm kulturor.
Kryetari i Shoqatës së Miqësisë Kosovë - Rumani "Dora D'Istria", Pleurat Sejdiu, ka thënë se do të bëjë përpjekje t'ia sigurojë dhe t'ia falë arkivin e Shoqërisë "Drita" Bibliotekës Kombëtare. Po ashtu, Sejdiu ka thënë se është në kontakt me disa familje shqiptare në Bukuresht të cilat kanë libra me vlera të mëdha kulturore, që t'ia sjellë ndërkohë edhe ato Bibliotekës Kombëtare. /gj.m/ /a.ke/