Kosovë/ Ortek në Brezovicë, humb jetën zyrtari i qeverisë së Kosovës, një tjetër dyshohet i zhdukur

Kryeministri Edi Rama ka reaguar lidhur me vdekjen e Arian Daçit. Rama shkruan se i përcjell shprehjet vëllazërore të keqardhjes për humbjen e thellë të gjithë familjarëve të zyrtarit të qeverisë së Kosovës.

"Çfarë trishtimi lajmi për humbjen e jetës së Arian Dacit dhe e pamundur të gjenden fjalë për të ngushëlluar familjen e babën e tij, mikun tim Nexhat Daci, të cilit i përcjell shprehjen vëllazërore të keqardhjes së thellë për këtë tragjedi të madhe familjare! I paharruar kujtimi."

Presidenti i Shqipërisë, Ilir Meta ka reaguar lidhur me vdekjen e zv.ministrit të Kosovës nga orteku në Brezovicë. Në reagimin e tij, presidenti Meta është shprehu i tronditur nga lajmi. 

"Jam shumë i tronditur nga lajmi i hidhur i humbjes së jetës së zv/ministrit të Diasporës së Kosovës, Arian Daci gjatë tragjedisë në Brezovicë. Në këto momente të vështira për familjen Daci, të afërmit e miqtë e tyre, u qëndroj pranë, duke shprehur ngushëllimet e mia më të sinqerta për këtë humbje tragjike të parakohshme që na ka lënduar të gjithëve,"-shkruan Meta. 

Kreu i Partisë Demokratike, Lulzim Basha ka reaguar në lidhje me ndarjen nga jeta të zv.ministrit të Kosovës, Arian Daci.

"Me hidhërim të thellë mësova për vdekjen aksidentale të zv.ministrit të Diasporës në Qeverinë e Kosovës z. Arian Daci. Ngushëllimet e mija për familjen e z. Daci, për ish kryetarin e Kuvendit të Kosovës akademik Nexhat Daci, për Qeverinë e Kosovës dhe miqtë e kolegët e të ndjerit,"- shkruan kryedemokrati Basha.

Reagime lidhur me vdekjen e zyrtarit të qeverisë së Kosovës ka pasur edhe nga Shqipëria. Ministrja për Marrëdhëniet me Parlamentin, Elisa Spiropali i ka shprehur ngushëllimet e saj familjes së të ndjerit. 

"Ngushëllime të ndjera familjes Daci për humbjen e njeriut më të dashur, ngushëllime qeverisë së Kosovës për humbjen e zv.ministrit të Diasporës! U prehtë në paqe shpirti i Tij!,"-shkruan ministrja. 

Presidenti i Kosovës, Hashim Thaçi ka reaguar lidhur me lajmin e ndarjes nga jeta të zyrtarit të qeverisë së Kosovës. Në reagimin e tij, Thaçi shkruan se i ka shprehur familjes së viktimës së ortekut në Brezovicë, ngushëllimet më të sinqerta.

"Me pikëllim të madh kam pranuar lajmin për vdekjen tragjike të zëvendësministrit të Diasporës, Arian Daci, djalit të kryetarit të Akademisë së Shkencave dhe mikut tim, Nexhat Daci. Në këto momente shumë të rënda, si President dhe mik i familjes, në emrin tim dhe qytetarëve të Kosovës i shpreh ngushëllimet më të sinqerta kryetarit Daci dhe familjes së tij,"- shkruan Thaçi.

Kryeministri i Kosovës, Ramush Haradinaj ka reaguar lidhur me ngjarjen e ndodhur në Brezovisë, ku humbi jetën zyrtari i qeverisë së Kosovës, Arian Daci.

"I tronditur nga fatkeqësia në Brezovicë, ku humbi jetën Arian Daci, zëvendësministër i diasporës, kurse mbeti i lënduar Ardian Bakalli. Ngushëllimet më të sinqerta mikut tim, Akademik Nexhat Dacit, familjes së ngushtë të Arianit si dhe miqve e kolegëve të tij,"- shkruan Haradinaj. 

Zbulohet identiteti i viktimës së ortekut në Brezovicë. Bëhet fjalë për djalin e ish-kryetarit të Kuvendit të Kosovës, Nexhat Daci, Arian Daci. Në nëntor të vitit 2017, Arian Daci ishte emëruar Zëvendësministër i Diasporës në Qeverinë e Kosovës. Mësohet se familja Daci ka një vilë në Brezovicë dhe zëvendësministri ka qenë dukë kaluar fundjavën atje.

Viktima Ardian Daci