Kreditë me probleme arritën një rekord të ri në tremujorin e tretë të vitit duke kapur kuotën 22.7 për qind e totalit.

Të dhënat e fundit zyrtare nga Banka e Shqipërisë tregojnë se në periudhën korrik-shtator, huatë e pashlyera në banka u rritën me mbi 1.5 pikë përqindjeje, ndërsa krahasuar me një vit më parë ato janë 4.7 pikë përqindje më të larta.

E thënë në vlerë shifra është 1 miliardë e 265 milionë dollarë ose mbi 10 për qind e Prodhimit të Përgjithshëm Bruto. Pas 2009-ës, kreditë e pashlyera janë rritur nga viti në vit duke reflektuar ngadalësimin e rritjes ekonomike dhe tkurrjen e të ardhurave të disponueshme në ekonomi.

Por së fundmi, rritja e tyre është ushqyer edhe nga një tjetër faktor, që lidhet me vështirësitë financiare të buxhetit. Dy vitet e fundit, Qeveria ka krijuar një rrjet të gjerë detyrimesh të pashlyera ndaj kompanive private, të cilat kanë kryer punë publike, kryesisht në ndërtim.

Banka Botërore tha pak ditë më parë se shifra mund të jetë nga 1.5 deri në 2 për qind e Prodhimit Kombëtar.

Edhe pse nuk është pranuar asnjëherë zyrtarisht si nga qeveria ashtu dhe Banka e Shqipërisë si përgjegjësja direkte për stabilitetin financiar të vendit, FMN dhe Banka Botërore këmbëngulin se detyrimet e fshehura të buxhetit e kanë transferuar zinxhirin e borxhit në banka.

Pasi në pamundësi për të arkëtuar paratë nga Qeveria, bizneset nuk mund të shlyejnë kreditë që kanë marrë në banka. Rritja e kredive të këqija ishte një nga shqetësimet e evidentuara më fort nga Fondi Monetar Ndërkombëtar, në misionin e tij të fundit në Shqipëri. Në deklaratën publike, shefi i misionit të FMN i kërkoi Qeverisë të ndërhyjë me masa urgjente, fillimisht duke shlyer të gjitha detyrimet që ka ndaj privatëve dhe më pas forcimin e sistemit ekzekutues të garancive./TCH