Krimi makabër në Vlorë,nusja
vrau e dogji burrin e vjehrrënNënë e bir u masakruan me sëpatë

VLORE - Policia e Vlorës ka zbardhur ngjarjen makabre të ndodhur në janar të këtij viti, ku u vranë dhe u dogjën tragjikisht në banesën e tyre nëna dhe djali i saj.

Policia ka arrestuar dy autorët e krimit, njëri mes tyre është nusja e viktimës, si dhe i dashuri i saj, me të cilin dyshohet se kishte një lidhje jashtëmartesore. Pikërisht kjo është bërë shkak i krimit makabër, pasi burri i 32-vjeçares Hysnie Hoxhallari kishte kuptuar tradhëtinë e gruas.

Hysnie Hoxhallari është autorja e krimit të tmerrshëm, që tronditi qytetin bregdetar, e cila në bashkëpunim me 26-vjeçarin Kasëm Pirjasi, me të cilin kishte krijuar lidhjen jashtëmartesore, ka dhunuar e vrarë burrin dhe vjehrrën e saj dhe më pas i ka vënë flakën banesës së tyre, duke iu djegur trupat e pajetë. 


(Kasëm Pirjasi dhe Hysnie Hoxhallari, e akuzuar për vrasjen e burrit dhe vjehrrës)

Uniformat blu sqarojnë se çifti i autorëve të krimit kanë djegur banesën me qëllim fshehjen e provave, duke synuar për ta devijuar ngjarjen si "aksidentale". Ndërkohë, pas hetimit të detajuar policor është dokumentuar me prova ligjore autorësia e vrasjes së dyfishtë dhe djegia e trupave të dy shtetasve, nënë e bir, ngjarje e kryer nga nusja e tyre.


(Sëpata me të cilën dyshohet se u vranë nënë e bir)


(Viktimat Olsi Hoxhallari dhe nëna e tij) 

Njoftimi i plotë i policisë:
Konferencë për shtyp e Drejtorit të Drejtorisë Vendore të Policisë Vlorë, Gentjan Shehaj, për zbardhjen dhe dokumentimin me prova ligjore të vrasjes së dyfishtë, të ndodhur në muajin Janar 2018 në lagjen “24 Maji", Vlorë. Vihen në pranga dy autorët e vrasjes, sekuestrohet edhe arma e ftohtë me të cilën dyshohet së është kryer krimi!

Strukturat e Hetimit të Krimeve të Rënda në Drejtorinë Vendore të Policisë Vlorë, në bashkëpunim të ngushtë me Prokurorinë e Rrethit Gjyqësor Vlorë, finalizuan operacionin e koduar “Devijimi”, ku është bërë e mundur zbardhja dhe dokumentimi i ngjarjes së ndodhur në muajin Janar 2018 në lagjen “24 Maji” Vlorë.

Ky operacion erdhi si rezultat i punës profesionale të pandërprerë, duke vlerësuar maksimalisht informacionet e grumbulluara, si dhe provat e administruara nga grupi hetimor, të cilat çuan në dokumentimin me prova ligjore të autorësisë së vrasjes së dyfishtë dhe të djegies së trupave të dy shtetasve, nënë e bir.

Hetimet intensive nisën menjëherë pas ngjarjes së ndodhur në muajin janar, ku u gjetën të pajetë e të djegur në banesën e tyre shtetasi O.H. dhe nëna e tij shtetasja S.H., pasi nga grupi hetimor u krijua bindja se nuk kishim të bënim me një ngjarje aksidentale, por me një vrasje.

Si rezultat i operacionit u bë kapja dhe ndalimi i shtetasve: Hysnie Hoxhallari, 32 vjeçe, banuese në Vlorë. Kasëm Pirjasi, 26 vjeç, banues në Strum, Fier. Të dy shtetasit e mësipërm në bashkëpunim me njëri-tjetrin, për motive të dobëta, kanë dhunuar e më pas kanë vrarë shtetasit O.H., e S.H., si dhe kanë shkaktuar zjarr në banesë me qëllim fshehjen e provave duke synuar për ta devijuar ngjarjen si "aksidentale".

Në cilësinë e provës materiale është gjetur dhe sekuestruar arma e ftohtë me të cilën dyshohet se është kryer krimi (mjet prerës i fortë prej metali). Materialet hetimore iu referuan Prokurorisë së Rrethit Gjyqësor Vlorë, për veprën penale “Vrasja në rrethana cilësuese, kryer në bashkëpunim”, e parashikuar nga nenet 79/dh dhe 25 të Kodit Penal.

 

Policia e Vlorës, shprehet e vendosur të godasë me Forcën e Ligjit çdo akt, grup kriminal apo paligjshmëri, dhe në këtë kuadër fton qytetarët dhe mediat në bashkëpunim, me qëllim krijimin e një ambjenti sa më të sigurt për të gjithë.

 

(Deklarata e policisë Vlorë)

d.c./shqiptarja.com