Kriza, të ardhurat
rishikohen me ulje 12%

TIRANE- Duke filluar nga 2011- a, vlerësimet e qeverisë shqiptare kanë ndryshuar tri herë brenda vitit. Kështu, sa i përket Prodhimit të Brendshëm Bruto, për vitin në vazhdim ai parashikohet 1.326 miliardë lekë në fillim të vitit, 1.320 miliardë ne korrik dhe 1.319 miliardë në nëntor. Këto shifra për vitin e ardhshëm luhaten edhe më shumë, por gjithnjë në ulje, duke kaluar nga 1.426 miliardë, në 1.409 miliardë dhe përfundimisht në 1.390 miliardë lekë. Në vitin 2013, vlerësimet janë përkatësisht 1.537 miliardë, 1.502 miliardë dhe 1.477 miliardë lekë, me një ulje nga shkurti deri në nëntor në masën katër për qind. E njejta situatë paraqitet edhe për 2012-ën, me 1.652 miliardë në shkurt, 1.602 miliardë të vlerësuara në korrik dhe 1.575 miliardë lekë në fund të vitit, me një ndryshim gati 5 për qind në ulje. Të ardhurat buxhetore ndjekin të njejtën tendencë
korrigjimi në ulje. Kështu, për 2014-ën ishin parashikuar 448.1 miliardë lekë të ardhura, por ato janë ulur në 417.7 miliardë në korrik dhe, madje, në 400.7 miliardë në nëntor, me ulje në masën gati 12 për qind.
Përsa i përket këtij viti, qeveria parashikon rënie nga 362.2 miliardë lekë të parashikuara në fillim, në 334.1 dhe 329.8 miliardë lekë në nëntor. Për vitin e ardhshëm këto shifra kalojnë nga 377 në 354 miliardë lekë.
Shpenzimet buxhetore parashikohen të gjitha, gjithashtu, me ulje. Për këtë vit, ato kalojnë nga 409 miliardë në 377 miliardë lekë, vitin e ardhshëm vlerësohen nga 420 në 395 miliardë lekë dhe për 2013-ën shifrat kalojnë nga 457 miliardë, në 436 miliardë dhe në fund në afro 420 miliardë lekë, duke kapur sërish atë nivel që ishte parashikuar në fillim për 2012-ën. Për vitin 2014, duket se kishte qenë shumë i guximshëm
objektivi për të shpenzuar afro 500 miliardë lekë nga buxheti i shtetit dhe shifra është korrigjuar dy herë, për të arritur në 447 miliardë lekë të reja. Defiçiti buxhetor synohet të mbahet në kontroll, për t'u larguar sa më shumë nga niveli prej shtatë përqindësh i 2009-ës e për të kaluar vitet e ardhshme në tre për qind. Megjithatë, borxhi publik do të ishte më shumë se 6.6 miliardë euro në fund të vitit 2014.