TIRANE-Kryeministri Edi Rama përmes një postimi në rrjetet sociale u është rikthyer akuzave ndaj Sali Berishës, pas deklaratave të këtij të fundit kundër Presidentit Thaçi në lidhje me debatin e ndryshimit të kufijve Kosovë-Serbi.
Kreu i qeverisë shprehet se Berisha gjatë luftës së Kosovës furnizoi me naftë tanket e Millosheviçit dhe luftëtarët e UÇK-së i shpalli terroristë, ndërsa tani e quan Presidentin e Kosovës argat albanofob të Beogradit.
"Furnizoi me naftë tanket e Kasapit të Beogradit. Bëri thirrje për të refuzuar Rambujenë. Shpalli terroristë marksistë-leninistë luftëtarët e UÇK. Ibrahim Rugova s'denjoi t'i fliste më derisa vdiq. Sot e quan Presidentin e Kosovës argat albanofob të Beogradit! Vesi del me shpirtin" shkruan Rama.
Që nga momenti i hapjes së debatit nga Thaçi në Kosovë për një marrëveshje me Serbinë që mund të përfshinte edhe rishikimin e kufijve, Berisha e ka akuzuar Presidentin e Kosovës si argat të Beogradit.
Thaçi e ka ftuar Berishën në debat publik pas akuzave, por ky i fundit është përgjigjur duke deklaruar se më parë është i gatshëm për debat me Presidentin e Serbisë, Aleksandër Vuçiç se me Thaçin.
