"Kukësi", Meta sqaron: Mandati
i Beratit na bashkoi me PS-në

LEZHE - Kryetari i Lëvizjes Socialiste për Integrim, Ilir Meta nga qyteti i Lezhës ka sqaruar bashkimin e votave me Partinë Socialiste, për ngritjen e një Komisioni hetimor për numërimin e banorëve të Kukësit.

Sipas Metës veçse shprehje e një qëndrimi parimor, vendimi i djeshëm lidhet me qëndrimin e shprehur më parë prej partisë së tij, për reduktimin e një deputeti në qarkun e Beratit.

“Është një qëndrim yni politik dhe parimor që në tërësi shkon në favor të gjithë komisione hetimore parlamentare pavarësisht se kush i kërkon në interes të një transparence maksimale. Përveç këtij qëndrimi parimor, së dyti është bërë publik qëndrimi ynë politik për këtë çështje kur ne kemi shprehur shqetësimin tonë apo mosaprovimin tonë për reduktimin e një deputeti në qarkun e Beratit”, u shpreh kreu i LSI Ilir Meta.

Pas takimit me anëtarë të LSI në rrethin Kurbin, Mirditë e Lezhë, Meta deklaroi se qëndrimi kundërshtues me Grupin Parlamentar të Partisë Demokratike nuk ndikon në koalicionin me qeverinë. Sipas tij LSI ka vepruar mbi bazën e parimeve të saj edhe herë të tjera.

Meta u ndal në këto zona me anëtarë të LSI-së në festime në prag të festave të fundvitit. Në takimin përmbyllës në Lezhë, Meta shtoi se është tepër e nevojshme që ky qark të përfaqësohet nga një deputet i LSI-së në mandatin e ardhshëm, si një formë për të dërguar në parlament zërin e qytetarëve të këtij qarku.

Propozimi për ngritjen e një Komisioni Hetimor për hetimin e veprimtarisë së organeve shtetërore mbi lëvizjen e popullsisë në disa njësi vendore të qarkut Kukës gjatë periudhës qershor-nëntor 2012.

Kjo kërkesë u hodh poshtë nga mazhoranca gjatë votimit në seancën e djeshme parlamentare me 69 vota, ndërsa 62 ishin pro. Votuan pro Ilir meta, Nasip Naço, Lefter Koka të LSI-së, ndërsa abstenoi Vangjel Tavo i LSI-së.

Redaksia Online
(Gre.M/Shqiptarja.com)