Pas hedhjes së gazit lotsjellës, Kuvendi i Kosovës pa praninë e partive opozitare, vazhdoi punimet e mbledhjes së sotme dhe miratoi një sërë projektligjesh.

Ndër to, u votua edhe programi kombëtar për zbatimin e Marrëveshjes për Stabilizm-Asociim.

Pikë e rendit të ditës ishte edhe shqyrtimi i Rekomandimit të Komisionit për Integrime Evropiane, lidhur me Programin Kombëtar për zbatimin e MSA-së, rekomandim ky që u votua nga deputetët.

Kuvendi vazhdoi mbledhjen me miratimin e disa projektligjeve; atij për gazin natyror, projektligjin për Rregullatorin e Energjisë, projektligjin për Energjinë Elektrike, atë për Energji, dhe projektligjin për rregullat e Komunikacionit Rrugor.

Nga rendi i ditës është hequr shqyrtimi i parë i Projektligjit për Tregtinë me Produkte të Naftës dhe Karburante të Ripërtritshme në Kosovë.

Kuvendi miratoi edhe projektligjin për Siguri në Punë në veprimtarinë minerare dhe projektligjin për Mjekësinë Ligjore.

U miratua edhe formimi i organit përzgjedhës të pavarur për zgjedhjen e anëtarëve në Organin Shqyrtues të Prokurimit.

Kuvendi formoi komisionet ad-hoc me propozime të atyre grupeve parlamentare që ishin të pranishëm në seancë, për Bordin e Radiotelevizionit të Kosovës, si dhe të Komisionit të Pavarur për Media. ATA

Redaksia Online
(F.T/shqiptarja.com)