Një nga fshatrat më të veçantë në Shqipëri, me një histori që shkon mijëra vite pas në kohë, është Lini në Pogradec.

Sipas studimeve arkeologjike të kryera prej vitesh, vendbanimi i kësaj zone rezulton rreth 2000 vite më i vjetër se vendbanime të ngjashme në Zvicër, duke e renditur ndër më të hershmit në Europë.

I vendosur buzë liqenit të Ohrit, Lini dallohet për arkitekturën karakteristike, shtëpitë prej guri dhe strukturën e ruajtur ndër vite, duke mbetur një nga zonat më autentike në vend.

Këtë e ka theksuar edhe ministri Blendi Gonxhja, i cili e cilëson Linin si një thesar të rrallë të trashëgimisë kulturore.

“Mirëmëngjes nga fshati piktoresk i Linit, në Pogradec, një thesar i rrallë i trashëgimisë sonë kulturore që tashmë është shpallur pasuri kulturore e paluajtshme si “Ansambël Arkitektonik Urban” me vendim të Këshillit të Ministrave. Një vendim i cili synon jo vetëm mbrojtjen dhe ruajtjen e vlerave unike historike e arkitektonike të Linit, por edhe restaurimin dhe administrimin e tij, duke përcaktuar qartë zonën mbrojtëse, rregullat dhe përgjegjësitë institucionale për të siguruar që ky destinacion i veçantë të ruhet dhe të trashëgohet ndër breza",u shpreh ai.

Një ditë më parë, qeveria e shpalli Linin pasuri kulturore e paluajtshme si “Ansambël Arkitektonik Urban”, një status që synon të garantojë ruajtjen e tij për të ardhmen.