Burime pranë mazhorancës bëjnë me dije se pavarësisht marrëveshjes me disa forca politike, përfshirë edhe Partinë për Drejtësi Integrim dhe Unitet, Rama nuk preferon që ministrinë e drejtuar nga Veliaj t’ia lërë aleatëve. Arsyet për këtë vendim janë disa.
Gjatë drejtimit të kësaj ministrie nga Erion Veliaj, qeveria arriti të realizonte reformën e pensioneve, reformë e cila përveç faktit se ishte një premtim elektoral është një nga arritjet më të rëndësishme për dy vitet e para të qeverisë. Gjithashtu shpërndarja e disa kësteve për ish-të përndjekurit politikë, shtresë e cila kishte shfaqur shumë pakënaqësi më parë është një tjetër arsye për të cilën, kryeministri nuk do të dëshirojë që Ministrinë e Mirëqenies Sociale dhe Rinisë ta lërë në dorën e aleatëve.
Emrat që qarkullojnë deri tani për drejtimin e kësaj ministrie janë ato të ministres aktuale Eglantina Gjermeni dhe deputetes Olta Xhaçka. Gjithashtu mes emrave të pritshëm për në Qeveri është ai i Blendi Klosit, - i diskutuar më parë si kandidat për Tiranën, - dhe i Eduard Shalsit.
Lëvizja e ministres së Zhvillimit Urban Eglantina Gjermeni në vend të ministrit Veliaj, do të linte një post ministror bosh i cili mendohet që t’i lihet aleatëve të rinj të PDIU. Më shumë se sa një marrëveshje parazgjedhore, firmat e hedhura nga kryeministri Rama e kreu i PDIU-së Shpëtim Idrizi kanë vlerë për bashkëqeverisjen dhe ndarjen e posteve të caktuara në qeveri. Partia e Idrizit ka shfaqur ambicien për një post në qeveri pa përcaktuar konkretisht se cilën ministri lakmon.
Krahas një ministrie, Rama mësohet të ketë negociuar me Shpëtim Idrizin edhe për postin e një zv/ministri që sipas të gjitha gjasave do të jetë ai në Ministrinë e Jashtme. Një tjetër emër i përfolur si zëvendësuese e ministrit Veliaj pasi ai të heq dorë nga posti i ministrit është ai i deputetes Olta Xhaçka. Kryeministri ka treguar se ka ditur të bashkëpunojë shumë mirë me gratë në qeveri.
Kështu dorëheqja e një ministri nga qeveria Rama do të bëjë precedentin e dytë në këto dy vite qeverisje. Në verën e vitit të kaluar ministri për Marrëdhëniet me Parlamentin Ilirjan Celibashi për arsye personale u dorëhoq nga posti i ministrit, duke lënë vend vakant vendin e tij. Kreu i qeverisë Rama zgjodhi që menjëherë në vend të Celibashit në ministrinë e krijuar pas zgjedhjeve të 23 qershorit 2013 të emëronte deputeten e qarkut të Beratit, Ermonela Felaj.
Ndaj edhe përzgjedhja e një tjetre deputeteje femër apo edhe një ministreje aktuale në vend të Erion Veliaj është e mundur. Sot Rama pritet të përmbyllë një tjetër marrëveshje me një aleat të ri, Bamir Topin e Frymës së Re Demokratike. Ish-Presidenti Bamir Topi ka qenë i kujdesshëm në të gjitha daljet e tij për të theksuar se është një forcë politike e qendrës së djathtë, megjithëse pritet të bëhet pjesë e një koalicioni të majtë.
Megjithatë kryeministri Rama aleancat e nënshkruara me krerët e forcave politike më shumë se sa për zgjedhjet vendore të 21 qershorit duke se po i përgatit për betejën e vitit 2017 në të cilën do të kërkojë të rikonfirmojë qeverinë e tij. Edhe për Topin, Rama pritet të ofrojë disa numra në Këshillat Bashkiak dhe dy poste zv/ministrash.
Poste për PDIU
Firmat e hedhura nga kryeministri Rama e kreu i PDIU-së Shpëtim Idrizi kanë vlerë për bashkëqeverisjen dhe ndarjen e posteve të caktuara në qeveri. Rama mësohet të ketë negociuar me Shpëtim Idrizin edhe për postin e një zv/ministri që sipas të gjitha gjasave do të jetë ai në Ministrinë e Jashtme
Redaksia Online
(d.a/shqiptarja.com