“Kutia e xixëllonjave” e Atjon Zhitit 
  dhuratë Krishlindjesh për këdo

Një vit më parë, Atjon Zhiti kthehej nga Milano, Itali, ku vazhdonte studimet e larta për Filozofi, në familjen e tij në Tiranë. Kishte blerë dhe panetonin e Krishtlindjeve. Aksidenti fatal që i mori jetën mëngjesin e 20 dhjetorit 2014, nuk ia dha kënaqësinë e gostitjes…

Nëna e tij edhe pse ishte mbytur në më të madhin dëshpërim për humbjen e të birit, nuk harroi t’ua shpërndante panetonin e sjellë nga Atjoni miqve që erdhën për mort. Ndërsa një vit më pas, në Krishtlindjet e dyta pa Atjonin, familja ekspozoi pikturat. Janë punime spontane të fëminisë së tij dhe të adoleshencës. Ekspozita u çel të shtunën nën kujdesin e kritikut të artit Gëzim Qendro.

Ishin mbledhur studentë, miq të Atjonit nga Tirana dhe nga universitete të ndryshme të Europës, dashamirës të artit, shkrimtarë, botues, gazetarë, edhe nga Kosova, që admironin ngjyrat e Atjonit. Kuratori i ekspozitës, Gëzim Qendro, u shpreh se për të ishte një zbulim talenti që shpalos Atjoni. “Pas botimit të një libri me ese filozofike, “Per atë që dua ”, ky student,në çantën e të cilit si rrallëkush gjeje libra të shquar të emndimit, klasikë e modernë, na zbraz ngjyra, pas të cilave fshihen ndjesi dhe ide apo thjesht një emocion, që e tejkalojnë moshën, ose janë të pa moshë”, tha Qendro.

Në një stendë të veçantë ishin vendosur dhe disa libra, që në ballina kishin vizatime të Atjon Zhitit, kurse sipër tyre në një korrnizë të madhe ishte vendosur një ese, e gjitha si një poezi, që pikëzonte gjetjet dhe arritjet, vlerat artistike në pikturën e Atjon Zhiti, që kritiku e titullonte “Kutia me xixëllonja”.

Ja çfarë lexohej aty:

“Një kuti me xixëllonja. E lënë nxitimthi në ikje e sipër atë praggjëme që pikëlloi shumëkënd. E mbetur diku, gjysmë e përmbysur mbi barin e kopshtit të magjepsur të fantazisë së tij. Dhuratë për këdo. Nga Atjoni.”

Përmes kësaj ekspozite Atjon Zhiti shfaqet në kopshtin e magjepsur të fantazisë së tij, i cili sipas kuratorit Gëzim Qendro: “Si fëmijë i çuditi të rriturit me sigurinë dhe fjalët e pjekura, si i rritur i habiti me spontaneitetin dhe pastërtinë e fëmijës. Ai kopsht ishte bota e tij të cilën s’mund t’ia merrte apo përdhoste askush, ishte profilaksi shpirtërore dhe strategji mbrojtjeje nga çmendina jashtë tij ku shkelet pa mëshirë çdo gjë me vlerë… Këto janë vetëm xixëllonjat që arritëm të mbledhim. Dhuratë për këdo. Nga Atjoni.”

Ekspozita do të qëndrojë e hapur edhe dy javë.



Redaksia Online
(m.p/shqiptarja.com)