“Të hapësh dosjet, njësoj si të
hapësh varr pa skelet brenda”

TIRANE- Ish-kryetari i Kuvendit, Servet Pëllumbi është dakord me iniciativën që pritet të marrë mazhoranca për hapjen e dosjeve të sigurimit. Në një intervistë për “Shqiptarja.com”, ish-kryeparlamentari sqaron se pavarësisht iniciativës pozitive të mazhorancës për hapjen e dosjeve të sigurimit, pritshmëritë për të zbuluar gjëra me vlerë nga këto dosje janë të pakta.

Sipas Pëllumbit, zyrtarët përgjatë gjithë këtyre viteve pjesën më të madhe të dosjeve e kanë zhdukur, tjetërsuar dhe në shumë raste edhe ndryshuar, ndaj edhe të dhënat në dosjet ekzistuese janë në shumë raste të deformuara. Lidhur me hapjen e bunkerit anti-atomik “BUNK’ART” nga qeveria në periferi të Tiranës, Pëllumbi shprehet se debati mediatik është i kotë pasi kjo është një praktikë që ndodh në të gjithë botën.