Legalizimet, dosjet, të bllokuara prej 1 viti

Nga muaji gusht i vitit të kaluar, rezulton në fakt se nuk janë dërguar më dosje legalizimesh të objekteve ndërtesë për miratim në Këshillin e Ministrave. Drejtoria Rajonale e Tiranës ka qenë gjashtë muaj pa drejtor dhe kreu i komanduar nuk kishte të drejtë firme. Kjo ka bërë që puna të paralizohet. Po e njëjta gjendje paraqitet dhe në Drejtorinë e Përgjithshme. Kjo drejtori përgatit vetëm dosje të shtesave të pallateve. Ndërsa janë përgatitur dhe miratuar dosjet për shtesat në njësitë e kryeqytetit 1-7, ende nuk ka nisur procesi për njësitë 8-11. Në total janë bërë mbi 270 mijë kërkesa për legalizimin e objekteve informale, ndër të cilat janë verifikuar në terren vetëm 113 mijë. Procesi ka ngecur në dërgimin e dokumenteve nga ALUIZNI dhe institucionet e tjera tek qeveria, që miraton lejen e legalizimit. Deri në qershor të vitit të kaluar ishin dërguar për miratim 54 mijë dosje legalizimi dhe nga këto janë hipotekuar 4.504 objekte ose 1.6 për qind e të gjitha kërkesave. Ndërkohë, paratë që po mblidhen nga procesi i legalizimit s’mjaftojnë për kompensimin e pronarëve të trojeve. Megjithëse qeveria ka futur në lojë edhe pagesën me bono privatizimi, që kushtojnë shumë më pak se vlera e tyre nominale në treg, procesi është bllokuar, kryesisht si pasojë e korrupsionit shumë të përhapur në administratën qendrore dhe ato rajonale. Shumica e personave që kanë bërë pagesat nuk po gjejnë zgjidhjen e parashikuar me ligj, ndërkohë që qeveria nuk merr më vendime për lista të reja.